Tshiṱori nga: Silas Nduvheni. Ṱhalutshedzo nga: Khathutshelo Raliphaswa.
Kha manwe a mafhungo ane a sumba a tshi shusha vhukuma, ndi u wanala ha mufunwa wa kale wa Ridodzula Mudzanani we a vhulawa mathomoni a ṅwedzi uno nga ene mufunwa wawe wa kale Azwinndini Richard Mamali. Mamali ovha o vhigwa samuthu o lovhaho vhege mbili dzo fhiraho, nga murahu ha u wanala tshitumbi ngei Thathe Vondo huna bugu ya vhune ya Mamali, fhedzi vhege yo fhiraho o wanwa Mokopane a farwa.
Mamali wa minwaha ya fumbili-na-sumbe o vhulaha mufunwa wawe wa kale wa minwaha ya fumi-na-ṱahe nga ḽa raru Khubvumedzi ngei Hamagidi tsini na Ṱhohoyanḓou a fhedza a shavha, lwe mapholisa a thoma u zwimana nae. Tshiwo itsho tsho bvelela nga madekwana musi Ridodzula na ṱhama yawe ya mutukana vha tshi ṱangana na Mamali, we avha e na vhana vhavhili na Ridodzula. Ridodzula ori a tshi huwelela a tshi humbela thuso sa izwi o ṱhavhiwa, Mamali avha ono shavha afho he tshiwo tsha itea.
Tshitumbu tshe tsha wanala maḓakani a Thathe Vondo nga Ḽavhuṱanu ḽa malo Khubvumedzi ho humbulelwa uri ndi Mamali sa izwi na zwe zwa waniwa tsini natsho. Tsho wanala tsho fhiswa nga esidi muvhilini. O tsheiwa na zwanḓa, ṱhoho yo kwashiwa nga tombo, hone o ṱhukhilwa na minwe miraḓo ya muvhili. Mapholisa vhari ovha u thunthswa sa izwi ho wanala gulu tsini na tshitumbu. U wanala ha bugu ya vhune, na manwe mabammbiri a vhune, ndi zwone zwe zwa vha khatisedza uri vha humbulele uri ndi Mamali.
Tsedzuluso dzori dzi tshi bvela phanḓa vho mbo wana bugu ya vhune ya mufu ngomu tshikwamani zwe zwa khwaṱhisedza uri asi Mamali. Vha konaha u bvela phanḓa na u zwimana na Mamali. Madzina a mufu e a wanala Thathe Vondo ha athu u anḓadzwa nga mapholisa.
Muambeli wa mapholisa a Limpopo Vho Col Malesela Ledwaba vhari Mamali o wanwa nga thimu ya mapholisa a Ṱhohoyanḓou ngei Mahwelereng, Zone 17 ngei Mokopane, tshiṱirikini tsha Waterberg, nga Lavhuvhili, ḽa fumi-ṱahe Khubvumedzi, nga murahu ha u lumiwa ndevhe nga ha u dzumbama hawe vhuponi uho.
Khaladzi a Mamali, Thivhakoni Mamali, o vhidzwa uri aḓe u u khwaṱhisedza uri naa ndi khaladzi awe wa vhukuma naa. Tsedzuluso dzi kha ḓi bvela phanḓa.
Vho Vhengani Mamali, mme a muhumbulelwa vhari sa muṱa vha pfa zwoṱhe izwi zwi tshi vha shusha vhukuma.
Mamali o ḓi vhonadza khothe ya madzhisiṱiraṱa wa Ṱhohoyandou nga ḽa fumbili-rathi Khubvumedzi nga milandu mivhili ya bulayo. U tshe o dzula tshiṱokisini u swika a tshi ḓi vhonadza khothe nga ḽa mbili Ḽara.