Tshiṱori nga Victor Mukwevho. Ṱhalutshedzo nga Khathutshelo Raliphaswa.
Nga ḓuvha ḽo ḓalaho dzikhakhathi dzi takadzaho, vhatikedzi vho sala vho mangala musi hu tshi vhewa khare ntswa ya Musangwe ya vhupo ha Vhembe. Mukundi muswa ndi Tshinandala Mukundamago wa minwaha ya 28 u bva Tshifudi.
Tshifhinga itshi tsha ḓivhazwakale tsho itea nga tshifhinga tsha mitambo ya u fhedzisela ya muṱaṱisano wa Tshifudi Musangwe ya 2024/25, we wa farelwaho Tshifudi – "mecca" i ṱhonifheaho ya Musangwe – nga Mugivhela, ḽa 4 Phando.
Mukundamago o lwa a sa fheli mbilu kha dzi nndwa dzo vhalaho a sa athu ḓivhadzwa sa kundi nga u angaredza. Kha vhe a lwa navho ho vha hu na madzina a ḓivheaho kha wonoyo mutambo, u katela Chekasi, Cinia, Kila, Sole, na Chikavhelo.
Musi a tshi humbula nga ha gundo lawe, Mukundamago o amba uri lwendo lwa u vha muhali lwo vha lu lulapfu nahone lu na dzi khaedu. "Zwo thoma miṅwahani minzhi yo fhiraho musi khotsi anga vhe na vhone vha vha vhe mulwi, vha tshi ṱuwa na nṋe mitambo ni yawe na minwe ya u tou ṱalela fhedzi. Hezwo zwo thoma nga 2012, fhedzi gundo langa lihulwane ḽo ḓa nga 2018 musi ndi tshi thoma u lwa. Nga 2022 na 2023, ndo lingedza fhedzi nda sa kone u wina. Nga 2024, khotsi anga, Vho Reckson Mukundamago, vho mmbudza uri ndi ṱuwe ngazwo," a amba.
Mukundamago o khoḓa u tamba hawe hu sa shanduki kha ṅwaha wo fhiraho nga ṅwambo wa u bvelela hawe. "A zwo ngo ntshuwisa musi ndi tshi vhewa sa muhali. Zwoṱhe ndi zwi koloda khotsi anga, vhe vha nṱuṱuwedza uri ndi tevhele wonoyu muḽoro. Ndi fulufhedzisa vhathu vha Tshifudi uri ndi ḓo lwela tshiphuga nda ita uri vha dihudze nga nṋe. Kha vhe nda vha kunda, ndi ṋekedza davhi ḽa muṱwari – ḽi songovha ḽa muthu nga eṱhe. Ri fhano u itela u vhulunga mvelele yashu, nahone zwi fhela luvhanḓeni," o engedza nga u sea.
Vho Pfarelo Mahadulula, muṅwe wa vharangaphanḓa vha Tshifudi Musangwe, vho ṱalusa khalanwaha yo fhiraho sa iṅwe ya khwine kha ḓivhazwakale ya Musangwe. "Ro vha ri na tshigwada tsha vhathu vha re na vhukoni u bva nga ḓuvha ḽa u thoma, u swika kha u vala ha khalanwaha mafheloni a vhege o fhiraho. Sa vhadzudzanyi, ro takala nahone ri livhuwa vhathu vhothe vhe vha ri tikedza tshifhinga tshothe. Ri a ḓihudza nga maanḓa nga u rwela khare Tshinandala Mukundamago sa ngweṋa na u vha wa vhuvhili khae, Muphulusi Muvhango – ane a ḓivhiwa sa Phiringwenya nga luambo lwa Musangwe. Mukundamago o sumbedza u sa shanduka kha nndwa dzawe dzoṱhe, nahone ri mu tamela mashudu nga tshifhinga tsha vhuvhusi hawe na kha nndwa dzine a ḓo dzi lwa," vha amba.