Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Muofirisi wa mapholisa wa kale we mulandu wawe wau vhulaha wovha wo thudze kule uḓo dovha a ima khothe hafhu kha wonowo mulandu. Nga hetshi tshifhinga, u khou lavhelelwa u ḓiimelela kha mulandu wauri o thuntsha na u vhulaha murwa wa muṋe wa nnḓu he avha a tshi khou dzula hone nga murahu ha u kaidzwa nga u tamba muzika nga muungo wa nṱha.
Muofirisi uyu wa pholisa ane ndi Nditsheni Lefty Mphephu o farwa nga ḽa 21 dza Ḽara 2023 ngei Vuwani. U farwa hawe zwi tshimbilelana na tshiwo tshe tsha itea ngei Makwarela nga ḓuvha ḽa mulovha.
Mphephu wa minwaha ya 44, we avha a tshi khou shuma kha POPS ngei tshiṱitshini tsha mapholisa hohoyandou, o thuntsha Teith Muthige lunzhi-lunzhi thumbuni na kha muvhili wa nṱha, nga murahu ha u ṱaṱisana nga ha muzika muhulwane we pholisa ovha a tshi khou tamba nga muungo wa nṱha goloini yawe musi matshudeni vha tshi khou vhalela milingo yavho ya u fhedzisela.
Nga murahu ha u thuntshwa, Mphephu o ḓou shavhela muḓini wahawe kha vhupo ha Vuwani. Musi a tshi thoma u ḓivhonadza Khothe ya Madzhisiṱaraṱa ya Thohoyandou, o hweswa mulandu wa u lingedza u vhulaha nahone a dzudziwa dzhele. Mulandu wo mbo ḓi shandukiswa nga murahu wavha mulandu wau vhulaha nga murahu ha musi Muthige o no lovha nga ṅwambo wa u huvhala hawe atshi thuntshiwa nga Mphephu.
Mphephu o fhedza miṅwedzi ya sumbe a dzhele o lindela tsengo yawe. O vhofhololwa nga beili nga ḽa 8 Fulwana 2024, vha na nyimele dzi konḓaho, nahone beili yo vhewa kha masheleni a paḓaho R20,000.
Musi Mphephu a tshi bvelela khothe nga ḽa 5 Tshimedzi ṅwaha wo fhiraho, madzhisiṱaraṱa o dzhia tsheo ya uri mulandu u ḓo bviswa kha mutevhe nga ṅwambo wa u sa vha hone ha mvelelo dza ndingo dza u ṱolwa ha dzi gulu. Naho zwo ralo, mbofholowo yawe yo vha ya tshifhinga tshiṱuku. O ḓivhonadza khothe ya madzhisiṱaraṱa ya Thohoyandou hafhu nga Ḽavhuṱanu, ḽa 6 Fulwi uno ṅwaha. Mulandu wawe wo fhiriselwa kha dzi 9 Fulwi khothe khulwane ya Thohoyandou yo dzulaho khothe ya madzhisiṱiraṱa ya Waterval.
Musi a tshi ḓivhonadza Khothe Khulwane nga Musumbuluwo, mulandu wo fhiriselwa phanḓa uya kha ḽa 12 Fulwi u itela u ṋea tshifhinga vhaimeleli tshikhala tsha u vhala dokhethe.
Musi mulandu u tshi bviswa kha rolo ṅwaha wo fhiraho, tshitshavha tshapo tsho sala tsho tshuwa nahone tshi sa tendelani nazwo. Muṅwe wa vhadzulapo vha kwameaho vhe vha amba ndi mulwela-mbofholowo wa tshitshavha Tovho Seemise, vhe vha ṱalusa tsheo ya u bvisa milandu iyi sa u bvisa vhulamukanyi. Nga Musumbuluwo, o vha e khothe nahone o vha e munna o takalaho hafhu.
"Sa tshitshavha, ri pfa ri na fulufhelo ḽihulwane sa zwine mafhungo a ima zwone zwino. Musi mulandu u tshi bviswa kha rolo ṅwaha wo fhiraho, ro pfa ro ṱungufhala nga maitele a vhulamukanyi. Zwino ngauri mulandu wo vhuyelela kha rolo, ri ḓo lindela mvelele dza vhulamukanyi a tshi rembuluwa nga luvhilo lwawo. Naho zwi tshi khou lenga, ri a zwi ḓivha uri ḓuvha ḽi ḓo fheleledza ḽo swika," vho ralo.
Vho engedza nga uri tshitshavha tshapo tshi ḓo bvela phanḓa na u tikedza muṱa wa mupondwa. "Ri dovha ra takala uri vhabebi vha munna o vhulahwaho vho ḓala fulufhelo ḽa uri khaṱulokwayo i ḓo fheleledza yo kunda," vho ralo.