Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Takalani Malindi wa minwaha ya furaru wa u bva kusini kwa Tshitereke nnḓa ha Ṱhohoyandou, u touvha tsumbo ya uri muthu anga shandukisa vhutshilo hawe havha ha khwine. Takalani zwa zwino o novha rabulasi, u ṱavha miroho ine ya takalelwa nga vhunzhi havhadzulapo. Zwibveledzwa zwawe ndi zwine wa zwi wana muḓini wa nnyi na nnyi kusini honoko.
Takalani o shanduka nḓila dza u tshila u bva kha uvha mudahi wa zwidzidzivhadzi na zwikambi uya kha nḓila dza uvha mulimi wa ndeme kusini kwa Tshitereke.
Nga u shumisa hawe zwidzidzivhadizi na zwikambi, o litsha tshikolo kha murole wa vhufumi-thihi, a kundelwa u tholiwa kha mishumo minzhi ine a isa khumbelo ya mushumo. "Ndovha ndi tshi ṱwa na vhathu vha songo teaho. Rovha ri tshi anzela u dzula ri tshi ṋwa zwikambi na u daha zwidzidzivhadzi vhusiku na masiari, zwe zwavha zwi tshi ri fhedzela tshifhinga husina zwine ra khou bveledza zwavhuḓi. Kha nḓila yanga iyo ya kale, hovha husina ane nda mu thetshelesa a tshi nngeletshedza," a amba.
O touvha mashudu mavhuya a tshi ṱangana na munwe muthu nga ṅwaha wa gidimbili fumiṱahe e a kona u mu ṋea nḓevhe a tshi mu ṋea ngeletshedzo. Ngau shumisa ngeletshedzo iyo ye a ṋewa yone, o kona u shandukisa nḓila dzawe, hone ha ḓi tsoli kha u dzhia ngeletshedzo iyo. "Vhulimi ndi lutamo lwanga lwa u thoma. Ndo thoma ndi na zwiṱuku, fhedzi bindu ḽanga 'Taki's Green Land', ḽi khou aluwa zwavhuḓi," a amba.
Ahuna zwine zwa takadza Takalani u fhira uvha mulimi na u vhona zwibveledzwa zwawe zwi tshi aluwa ubva kha uvha mbeu u ya kha uvha miroho ine ya rengwa. Bindu ḽawe ḽa vhulimi ḽi khou aluwa zwavhuḓi hone ho novha na vharengi vhanzhi vhane vha takalela miroho yawe. "Ndi ṱavha tshaka nnzhi dza miroho, dzine nda dovha nda rengisela mavhengele khole-khole a kusini kwashu na mavhengele mahulwane. Masheleni ane nda a wana kha vhulimi hanga, ndi ane nda shumisa u ḓi unḓa. Bindu ḽanga ḽo shandukisa vhutshilo hanga nga nḓila yavhuḓi," a engedze.
Muḽoro wa Takalani ndi u ḓi wana a na bindu na tsimu khulu hune a ḓo kona na u sikela vhathu mishumo. "Ngeletshedzo ine nda nga nea vhaswa ndi uri vha ṱoḓe pfunzo vha ṱutshele kule na zwikambi na zwidzidzivhadzi ngauri ahuna zwine zwa vhuyedza. Arali vho ḓi vhetshela dzi ndivho, avha shume vho ḓi nekedzela uri vha kone u swikelela ndivho dzavho. Ndo aluswa nga mme vhe vhavha vha sa shumi, makhulu anga vhe vhavha vha tshi ri ṱhogomela, vho dzulela u ri ṱuṱuwedza uri ri shume ro ḓi nekedzela na uvha na vhuḓifulufheli. Nga zwiṱuku nga zwiṱuku ndi khou swikelela muḽoro wanga," Takalani a amba.