Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Vho Mavis Khorommbi vha minwaha ya 64, mualuwa vha bvaho kusini kwa Tshitavha Vhulaudzi, vha khou eletshedza vhafumakadzi uri vha ḓi dzhenise kha vhulimi ha miroho. Vhari nga vhulimi vhafumakadzi vhaa kona u unḓa miṱa yavho vha dovha hafhu vha shela mulenzhe kha u alusa sekhithara ya vhulimi.
Vho Khorommbi vho thoma zwa vhulimi nga ṅwaha wa 1998 vhe na hekhithara mbili fhedzi. Zwa zwino vha na hekhithara ṱhanu, vhashumi vhaṋa vha tshoṱhe na vharathi vhane vha tou shuma nga u vhidzwa. Vha lima dzi khavhitshi, maṱamaṱisi, mirambo, zwine vha kona u unḓa muṱa wavho vha dovha vha salelwa na zwibveledzwa zwine vha rengisela vhadzulapo vha kusi kwavho.
Vhari naho hu na dzi khaedu dzine vhalimi vha ṱangana nadzo, vhulimi ndi yone thikho ya ikonomi kha tshiṱiriki. Vha ṱuṱuwedza vhalimi vha vhafumakadzi uri vha farane, uri vha kone u thusana kha khaedu dzine vha ṱangana nadzo. "Vhulimi vhu a thusa kha u lwa na vhushai mivhunduni yashu, ha dovha hafhu ha shela mulenzhe kha u bveledzisa ikonomi."
Vho Khorombi vhari vha nga takalela u vhona vhafumakadzi vha vha tshi ḓi dzhiela nṱha hu sina u ḓi nyadza, zwihulu kha uvha vhorambindu. Vhari vha eletshedza vhafumakadzi uri vha wane nḓivho nga ha nḓila dza u tshimbidza mabindu. "U wana nḓivho ndi zwa vhuṱhogwa kha mveledziso ya ikonomi ya shango ḽashu. Muthu ane ha dzheneleli kha dzi nyambedzano na vhudavhidzani nga ha vhubindudzi ha koni u wana nḓivho ya khwine. Ahuna mishumo yo tou vhetshelwaho mbeu kha tshifhinga tsha zwino. Lifhasi ḽi khou shanduka ḓuvha ḽinwe na ḽinwe.
Uya nga ha Vho Khorommbi, vhathu vha fanela u ita zwine vha amba, na u shumisa vhukoni havho kha vhubindudzi. "Ahuna zwikhala zwinzhi zwine vha fhiwa vhafumakadzi kha vhulimi. Ri fanela u sedza vhulimi sa nḓila ya u bveledzisa ikonomi u fhira nḓila ya u bveledza zwimedzwa na u zwi rengisa. Vhafumakadzi vha nga thoma mabindu avho vha kona u vha thikho dza ikonomi yashu nga uvha vhalangi vha mabindu avho," vha amba.