Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Maanda "Eaglet" Ramadwa wa miṅwaha ya fumiṱhanu u na zwipikwa zwawe zwa u dzhena kha Banyana Banyana nga murahu ha miṅwaha i si gathi - nahone ho sedzwa kha mitambo yawe ya zwenezwino, muloro wonoyo u nga kha ḓi vha u si kule.
Ramadwa o vhuya u bva Ghana nga Swondaha, he a shuma sa mufarisa mukapuṱeni wa tshigwada tsha Afrika Tshipembe tsha U/15 tshe tsha vha tshi tshi khou ṱaṱisana kha Vhuṱaṱisani ha Bola ya Milenzhe ya Zwikolo zwa Afrika. Afrika Tshipembe ḽo vhuya na medala ya musuku hayani nga murahu ha u kunda mitambo miraru na u kundwa mivhili. Vho kunda DRC nga 8-0, vha kunda Gambia nga 5-0 vha kunda Morocco nga 2-1. Vho kundwa nga Uganda nga 1-0 vha dzhena fhasi nga 3-2 musi vha tshi tamba na Ghana vhane vha vha vhaeni.
Musi a tshi kha ḓi tou bva u vha muswa kha mutambo uyu, Ramadwa o vha o livhisa ṱhogomelo nga maanḓa kha mitambo ya u gidima, a tshi imela Tshikolo tsha Nṱha tsha Sinthumule kha mitambo ya u gidima. Musi bola ya milenzhe ya vhasidzana i tshi ḓivhadzwa tshikoloni tshawe nga 2023, o i vhona sa nḓila yavhuḓi ya u dzula o khwaṱha na u ṱavhanya vhukati ha khalanwaha dza mitambo. Fhedzi o ḓou rathela kha mutambo wa bola ya milenzhe, nahone vhukoni hawe sa mulinda vhuno ho mbo ḓi dzhielwa nṱha.
O khwinisa vhukoni hawe nga murahu ha musi o no dzhena kha thimu ya vhafumakadzi ya Sinthumulekutama yabola ya milenzhe, ine ya ṱaṱisana kha Ḽigi ya Vhafumakadzi ya SAFA Sasol. U livhuwa vhunzhi ha nyaluwo yawe kha mugudisi wawe, Vho Caswell Mohale.
Kha nyambedzano nga Ḽavhuvhili, Ramadwa o amba uri u ḓilaya ndi hone hune ha ita uri muthu a bvelele. O ombedzela ndeme ya pfunzo, zwihuluhulu kha vhatambi vhaṱuku. "Vha re na vhukoni vha fanela u linganyisela mishumo yavho ya mitambo na pfunzo," u ralo.
Ramadwa u na fulufhelo ḽa uri u ḓo swikelela zwipikwa zwawe zwinzhi, hu tshi katelwa na u tamba kha thimu ya lushaka. O vha a tshi zwi ḓivha uri u kha ḓi ṱoḓa tshenzhelo, fhedzi ha ṱutsheli khaedu. U dovha a tenda uri mutambo wa vhafumakadzi u na khonadzeo khulwane ya u aluwa.
"Ahuna mutambo we wa vha wo itelwa mbeu dzo nthihi fhedzi. Sa vhafumakadzi, ri a thivhelwa na u dzhielwa fhasi kha hoyu mutambo, zwine zwa ri fha zwiitisi zwinzhi zwa u sumbedza uri vhathu vho khakha," u ralo.