Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Vhadzulapo vha Tshifudi nnḓa ha Thohoyandou vho sala vho akhamala zwi tshi tevhela zwiito zwa munna we avha a tshi sumbedza o ṱangana muhumbulo a tshi thoma u thuntsha a sa londi a tshi thuntsha na vhashumi vha vhengeleni laurengisa halwa livhidzwaho Marubini nga awara dza tsini na vhukati ha vhusiku nga Lavhuṱanu ḽo fhiralo ḽa u thoma ḽa Khubvumedzi.
Hu pfala uri munna uyo ndi munna a bvaho Hadumasi nnḓa ha Thohoyandou, o swika afho hurengiwa halwa a khou shumisa goloi yawe ya lutandala ya Toyota ye ya fhedza yo fhiswa nga vhadzulapo vho sinyuwa.
Uya nga ṱhanzi ye ya zwi vhona nga maṱo, fhedzi a hana u bulwa dzina uri hovha ho vhilingana vhukuma. "Ndovha ndiha Marubini halwani ndi na ṱhama dzanga ri khoudi mvumvusea, Ro tou mangala ri tshi pfa hu tshi mubvumo wa tshigidi fhedzi ri sa ḓivhi uri zwi khou bva zwi thungo lufhio. Ha thoma u vhilingana vhathu vha tshi shavhela u tsireledza matshilo avho. Muhumbulelwa uyo we avha akhou thuntsha o fhedza o shavha a sia moḓoro wawe," vha amba.
Uya nga ṱhanzi iyi, vhanwe vha vhashumi vho vha vho thuntshwa lwe vha sala vho huvhala. "Vhathu vho lingedza u gidimisa munna uyo, fhedzi vha kundelwa u mu fara. Nga hone u sinyuwa, vha mbo funga moḓoro uyo wa swa ḽore," a engedza.
Muambeli mufareli wa SAPS ya Vhembe, Vho Dathi Vuledzani vho khwaṱhisedza tshiwo itsho, vhari ho vulwa milandu mivhili ya u lingedza u vhulaha. Muhumbulelwa, Thabelo Aubrey Matshona wa minwaha ya fumbili-rathi, o farwa hone o ḓi vhonadza Khothe ya Tshaulu nga Musumbuluwo wa ḽa nṋa Khubvumedzi. Mulandu wawe wo fhiriselwa phanḓa kha ḽa fumi-na-mbili Khubvumedzi uri vha bvele phanḓa na tsedzuluso. Hone Thabelo u tshe o dzudzwa dzhele.
Vho Rudzani Tshipepe, murangaphanḓa vha kusi uko, vho ṱahisa u akhamala havho nga zwiito zwa Thabelo, hone vha khou kaidza maiitele oraliho. "Hafha nnḓa ahu tshavha ho tsireledzeaho. Vhathu vhovha vha khou tou ṅwa mahalwa vha tshi ḓi mvumvusa, vha vho tou mangala hu tshi vho fhufha dzi gulu vha songo humbulela. Ri tou rulea mbilu sa izwi hu sina muthu o lovhaho. Ri fanela u dzula fhasi sa vhadzulapo ra wana nḓila dza u thivhelo maitele aya uri a songo tsha itea," vha amba.
Vhamusanda Vho Collen Mashau, vho ṱahisa vhupfiwa havho uri vho sinyuwa vhukuma nga zwe zwa itea ngei Marubini. "Ri a thoma u ṱangana na zwiito zwo raliho kha kusi kwashu. Ro akhamala vhukuma, fhedzi ri tou kuvhatedzwa ngauri ahuna muthu o lovhaho, naho hu na vhe vha huvhala. Ri dovha hafha ra fhumudzwa ngauri muhumbulelwa o farwa hone u ḓo livhana na tshanḓa tsha mulayo," vha amba.