Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Uvha hone ha mufhiso wo kalulaho kha zwipiḓa zwinzhi zwa shango, ho katelwa na vhupo ha Vhembe, vhathu vhanzhi vha khou vhonala vha khouya madamuni na milamboni u fhungudza mufhiso zwine zwavha nḓila dzo ḓoweleaho, zwihulu kha vhupo ha mahayani.
Vhadzulapo vha Tshilungoma, tsini na damu ḽa Nandoni, vha shumisa damu iḽo u dzimula mufhiso nga u bambela kha damu iḽo. Sa nga misi, nga Lavhuna maḓana a vhathu vhovha vho ḓadza damu iḽo vha tshi bambela. Izwi vha dzulela u zwi ita, naho hu na vhathu vhanzhi vhane vho no ṋuvhela kha damu iḽo minwaha yo fhiraho.
Zwezwo vhathu vha khou bambela nga Ḽavhuna iḽo ḽa fumbili-raru Ḽara, vho ḓou shushea musi munwe wavho a tshi ṋuvhela damuni iḽo, ane avha Tshedza Ravhutsi wa minwaha ya fumbili-raru.
Munwe wa dzi ṱhanzi, Murangi Mudau, ori vhathu vho tou mangala nga u pfa mukosi damuni. "Ro dou ṱavhanya raya afho he havha hu khou hwelelwa, ndi he ra wana Tshedza o no swika kule ngomu damuni. Hovha hu si na e avha oḓi imisela u dzhena ngomu uri amu phulusa sa izwi hu na dzi ngwena maḓini. Ro thoma ri tshi vhona unga o tou hwalwa nga tshithu, fhedzi musi ono bviselwa nnḓa, tshitumbu a tshingo sumbedza mafuvhalo kana u vhaiswa. Zwa zwino ro no vhaisala uri fhethu he ravha ro ḓi tika ngaho mufhisoni uyu ho novha fhethu hu songo tsireledzeaho," a amba.
Muambeli wa mapholisa Vhembe W/O Vho Vuledzani Dathi vho khwaṱhisedza tshiwo. "Ro ṱanganedza ṱhingo nga ha tshiwo, ra ṱavhanya raya he tshiwo tsha bvelela hone. Rori ri tshi swika, ra sumbedzwa he Tshedza a nuvhela hone. Vha u phulusa vho ḓou bvisa tshitumbu damuni. Hezwi ndi masinḓambilu, naho mifhiso yo kalula rikhou itakuwelelo kha vhadzulapo uri vha songo bambela fhethu hu songo tsireledzeaho u fana na madamu na zwisima," vha amba.
Ho vulwa mulandu wa tsedzuluso kha tshiwo itsho.