Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Kha vhunzhi ha mabulayo a shushaho vhuponi ha Vhembe, munna wa Maniini Block J ovhulaya mufunwa wawe Ronewa Nelukau, a ya kha maine uri vha mu handulule nga murahu ha u vhulaha mufunwa wawe, kha bulayo iḽi, munna uyo o ya a ḓi netshedza mapholisani na zwenezwo.
Nga Mugivhela wa ḽa fumi-mbili Ṱhangule, Ronewa wa minwaha ya fumbili-sumbe na mufunwa wawe vho vha na khuḓano vha nḓilani ya u vhuya u bva kha udibvubvusa halwani khalinwe la vhengele li lirengisaho halwa vhupo uvho, nga murahu ha khuḓano iyo, vha ya hayani. Vhadzulatsini, ṱhanzi dza maṱo dza khuḓano, vho ḓou ya muḓini vhafunani avho vhavhili nga matsheloni a ḓuvha ḽi tevhelaho (ḽa fumiraru) vha tshi ya u ṱola uri Ronewa u khou vuwa hani. O touvha masinḓa mbilu vha tshi wana tshitumbu tsha Ronewa o lovha. Munna uyo o no ngalangala, fhedzi o vha fulufhedzisa uri u ḓoḓi netshedza mapholisani nga murahu ha u handululwa nga maine.
Tshivhangi tsha bulayo ha Ronewa, ndi u tambudzwa ha mbeu, zwe zwa sia vha muṱa na vhadzulapo vho vhaisala vhukuma. Naho zwo ralo tshivhangi tsha khuḓano ye ya bvelela ya sia munna uyo o dzhia vhutshilo ha Ronewa zwi khou sedzuluswa nga mapholisa.
Bulayo iḽo ḽo sinyusa vhunzhi ha vhathu, zwihulu sa izwi ḽo bvelela nga ṋwedzi wa vhafumakadzi, hune vha fanela uvha vha khou pembelelwa. Kha vhanwe vhe vha kaidzela zwiito zwo raliho ndi Vho-Eric Maravha vhane vha vha mudzulatshidulo muthusi wa siviki ya Maniini Block J. Vho ṱahisa vhupfiwa havho uri vho vhaisala vhukuma. Vho-Maravha vhari, "Mupondi asi munna vhukati ha vhanna. U touvha ndau ine ya fanelwa nga u livhanywa na tshanḓa tsha mulayo nga nḓila yo teaho. Sa vharangaphanḓa ri swikisa ndiliso dzashu kha vha muṱa wa ha Nelukau." Vhadzulapo vha khou thuso vha muṱa nga masheleni a u ṋea Ronewa mbulungo i ṱhonifheaho.
Mudzulapo wa Maniini, we a nanga usa bulwa dzina, a tshi ṱahisa vhupfiwa hawe kha tshiwo itshi u ri ene u sola vhe vha ṱanziela khuḓano ya Ronewa na mufunwa wawe, fhedzi vha khetha u lavhelesa vha si thuse Ronewa naho ovha a khou humbela thuso. "Ri na munna we a ita mulandu a fhedza a ṱoḓa thuso ya maine a saathu u ḓi vhiga kha vha mulayo, naho zwo ralo huna vhathu vhe vha khetha u ima vha tou lavhelesa... tshitshavha tshashu tshi khou fhela, hone tshiwo itshi ndi tshi shushaho," a engedza.
Muambeli mufareli wa mapholisa a Vhembe, Sedzheni Vho-Vuledzani Dathi, vho khwaṱhisedza tshiwo, vhari munna wa minwaha ya fumbili-malo o farwa hone u ḓoḓi vhonadza khothe ya Magisiṱiraṱa wa Thohoyanḓou a tshi vhonwa mulandu wa u vhulaha.