Vha Masipala wa tshiṱiriki tsha Vhembe vha khou humbelwa u lugisa sworedzhi ine ina miṅwedzi i swikaho miraru yo tshinyala. Vho humbelwa nga vhadzulapo na vhadzula tsini vha tshikolo tsha fhasi tsha Makushu tshire ngei nga tshikolobulasi tsha Musina na vhabebi vha vhagudiswa vhane vha guda kha itsho tshikolo.
Vho-Magdelena Mokone (84) vhari vha vho balelwa u vula mafasiṱere a nndu yavho kana hone u dzula nnḓa ngau shavha lwefha sa izwi nnḓu yavho i tshi touvha mithara miṱanu na iyo sworedzhi."Ndi muthu ane u na vhulwadze ha Lufhiha, heyi nyimele i kwama mutakalo wanga nga nḓila isi yavhuḓi. A thi tsha ḓifhelwa ngau dzula hafha naho hu hone haya hanga hu hoṱhe. Vha Masipala vho ḓa nga ṅwedzi wa Phando fhedzi vha si lugise tshithu. Ndia vhilaela sa izwi vhana vha tshi tambela kha sworedzhi iyi," vha amba.
Vho-Magdalena vha dovha hafhu vha humbela vha masipala wa Musina uri vha vale nḓila ine vhadzulapo vha vho shumisa u laṱela mashika. "Munukho une wa bva kha tshika ine vhathu vha laṱa u vhaisa mutakalo wanga. Vha masipala vha fanela u ḓa vha dzhia mashika aya vha hu vala," vha engedza.
Vhadzulapo vhari vha tshi dalela tshikolo tsha Makushu vho vhona vhafumakadzi vhau bikela vhana tshikoloni vha tshi khou bika kha lufhera lwau bikela hanefho tshikoloni tshine tshi touvha mithara mivhili na mashika ane a elela a tshi bva kha sworedzhi iyo yo tshinyalaho, zwo vha sia vha songo takala. "Mutakalo wa vhana vhashu a ungo tshireledzea musi nyimele yo rali. Vha Masipala vha fanela u lugisa sworedzhi iyi nga tshihaḓu. Nyimele iyi i dovha hafhu ya kwama nḓila dzashu dza u shuma sa izwi ri tshi vha ri khou bikela vhana zwiliwa fhethu hune a hungo kuna," hu amba muṅwe wa vhafumakadzi vhau bikela vhana zwiliwa.
Mudzula tshidulo wa tshiimiswa kha vhupo ha Musina, Musina To The Front, Vho-Peter Jack vho vhudza vha gurannḓa ya Limpopo Mirror uri vhabebi na vhadzulapo vha na miṅwedzi vha tshi isa mbilaelo dzavho fhedzi vha Masipala ahuna zwine vha lugisa. "Heyi ndi tshinyalelo ya mutakalo, vhagudi vha ngasi litshe uya tshikoloni nga nyimele iyi. Ri humbela uri Masipala vha lugise zwi sathu vhanga malwadze kha vhadzulapo na vhagudiswa," Vho Jack vha amba.
Vhadzulapo avha thomi naṅwaha u isa mbilaelo dzavho ngau lugiswa ha sworedzhi iyi kha vha Masipala wa tshiṱiriki tsha Vhembe. Ṅwaha wo fhelaho, vhadzulapo vho ṱereka lwa vhege vha tshi ṱoḓa tshumelo ya khwine u katela na u kulumaga tshika yo hashwaho nga sworedzhi kha zwiṱaraṱa zwavho.