Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Mubveledzi wa vhulungu a ḓivheaho wa Thohoyandou Thanzi Munyai, nga murahu ha tshifhinga, o limuwa u vhilaela ngau fhungudzea ha mvelele yawe ya Tshivenḓa. O vhona vhaswa vha tshi khou tshimbila zwiṱaraṱani vha si na zwine vha ita - vhaṅwe vha tshi khou vhifha muvhilini, vhaṅwe vha tshi khou lingedza zwikambi na zwidzidzivhadzi.
Thanzi wa minwaha ya 34 ane a bva Maniini Block K o ḓiimisela u ita zwiṅwe zwithu ḽiṅwe ḓuvha u itela u thusa u vhuedzedza murahu nḓowelo ya Vhavenda.
Nga 2024, vha tshi khou ṱuṱuwedzwa nga lutamo lwavho lwa mvelele na u takusa tshitshavha, vho dzhia vhukando hau thoma "Tshigwada tsha Mvelele tsha Bvisa Thoho".
Tshigwada itshi tsho ḓitika nga Maniini, tsho thoma nga vhaswa vha si gathi fhedzi ṋamusi tshi ḓihudza nga miraḓo i fhiraho 70 i re na miṅwaha ya vhukati ha ṱahe na 30. Vha shela mulenzhe kha mishumo ya mvelele i ngaho u tshina ha malende, tshifasi, na vhurendi ha Tshivenḓa.
"Ndi khou takala vhukuma uri ndi khou fhedzisela ndo bveledza muloro wanga. Zwo mmbilaedza vhukuma u vhona mvelele yanga, ine nda i dzhiela nṱha vhukuma, i tshi khou fhungudzea na u fa nga u ongolowa. Vhaswa a vha tsha tevhela maitele ashu na zwilinganyo zwashu. Hu na vhasidzana vhaṱuku vho vhifhaho muvhilini vhanzhi nga ṅwambo wa u sa gudiswa havho zwine zwa lavhelelwa khavho nau shumisa havho zwikambi na zwidzidzivhadzi. Kha zwiṅwe zwiitea ri nga si vha vhone mulandu - ndi nga ṅwambo wa u ḓidina," vho ralo.
Vho-Munyai vhari tshigwada itshi tsho sedza kha u vala tshikhala itshi na u shuma sa mulanguli na mudededzi. "U sumbedza vhuḓikumedzeli havho, vhaswa vhanzhi vho ḓiṅwalisa nga murahu ha u thomiwa ha tshigwada, nahone ri khou takala uri tshivhalo tshi khou bvela phanḓa na u engedzea. Hezwi ndi vhuṱanzi ho eḓanaho ha uri, naho hu na zwithu zwi konḓaho, ri khou ṱavhanya u ya kha tshipikwa tshashu tsha u bvisa vhaswa zwiṱaraṱani na u vhona uri mvelele ya Vhavenḓa i fhiriselwa kha murafho u bva kha murafho," vho ralo.
Tshigwada tshi a ḓiḓowedza musi tshikolo tshi tshi bva. "Nga ḽa 23 dza Lambamai , vhovha vha tshi khou tamba ngei Tshaulu, nahone ho ḓa vhathu nga vhunzhi vhane vhavha vhafuni vha mvelele vha tshi ri tikedza," vha vhina.