Tshiṱori nga Silas Nduvheni. Ṱhalutshedzo nga Khathutshelo Raliphaswa.
U swikelela madi o kunaho zwi kha di vha khaedu kha mahalwa mivhunduni ya vhupo ha mahayani u mona na tshitiriki tsha Vhembe, Limpopo. Murangaphanda wa sialala wa Hamabila tsini na Vho-Ngalavhani, Vhamusanda Gegane II Mabila, vha ri vho dzudzanya u amba na Masipala wa Tshiṱiriki tsha Vhembe (VDM) u itela u tandulula ṱhahelelo ya maḓi vhuponi havho.
"Ri kha vhupo ha mahayani ho dzikaho, ho thithiswaho nga ṱhahelelo ya maḓi na bada dzi si dzavhuḓi, fhedzi zwino ndi ḓo ṱanganela na mimasipala," ho amba Vhamusanda Mabila.
Vho aniswa nga Mugivhela, wa dzi 22 Lara, vha tshi khou tevhela muṱahavu vho dzamaho, Vhamusanda Vho Mmbangiseni Mabila, vhe vha dzama nga Lambamai 2021. Muvhundu wo vha u si na murangaphanḓa a ḓivheaho u swika kha vhuṱambo ha u aniswa, vhune ha ḓivhiwa sa U ḓadza mativha, he ha vha hu tshi khou tshimbidzwa nga Thovhele Ratshibvumo II Rambuda.
Vho Thovhele Rambuda vho sasaladza dzikhakhathi dzine dza khou bvela phanda malugana na vhurangaphanda ha sialala na u tutuwedza mulalo. Vho dovha vha ṱuṱuwedza Gegane II Mabila uri vha range phanḓa mishumo ya mveledziso ya muvhundu, hu tshi katelwa na maḓi, u ita ngade, na u lima, na u lwa na vhutshinyi.
Nga tshifhinga tsha vhutambo, Ndamulelo Mabila vho nangiwa sa ndumi, na Tshifhiwa Mbedzi o mbo di vhewa sa khadzi.
Muimeli wa Thulamela Wapo wa Masipala Athongozwidivha Rambuda vho tanganedza murangaphanda muswa, vha tshi ri u dzhenisa havho zwi do tendela masipala u shumisana zwavhudi na muvhundu kha dzi projeke dza mveledziso.
"Arali hu si na vhurangaphanḓa ha mvelele ho teaho, zwi vha zwi tshi konḓa vhukuma kha masipala u shuma na vhadzulapo vha miḓini," vho ralo, vha tshi ombedzela ndeme ya vhurangaphanḓa kha u ṱuṱuwedza mvelaphanḓa ya tshitshavha.