Tshiṱori nga Silas Nduvheni. Ṱhalutshedzo nga Khathutshelo Raliphaswa.
Murangaphanḓa muswa wa sialala, Vhamusanda Vho Ntanganedzeni Nevondo, vho dadzwa maivha ngei Vondo ḽa fhasi nga Mugivhela wa ḽa 21 Nyendavhusiku 2024. U tevhela mune avho, munnaavhane Vhamusanda David Nevondo, vhe vha dzama nga Ḽara 2023.
Nga tshifhinga tsha vhuṱambo uhu, he ha vha ho farelwa mudavhini wa Vondo la Fhasi, murangaphanḓa muswa vho fulufhedzisa vhadzulapo vhapo uri u ḓo thetshelesa miraḓo ya vhaeletshedzi vha lushaka lwavho ngeno vha tshi khou vhusa nga hune vha nga kona ngaho. Vho topola ṱhahelelo ya maḓi na bada dzi si dzavhuḓi sa zwiṅwe zwa zwithu zwine zwa fanela u lavheleswa vhukuma nau tea u tandululwa. "Ri ḓo amba na vha Masipala wa Tshiṱiriki tsha Vhembe (VDM) u tandulula thaidzo dza maḓi," vha zwa Vhamusanda Nevondo.
Nga tshifhinga tsha vhuṱambo, Vho-Pretty Nevondo vho tiiwa sa khadzi, Phumudzo Nevondo a vhewa sa ndumi.
Vhamusanda Vho Muonyolosi Budeli, vhe vha tshimbidza mushumo uyu nahone vha dovha vha imela Thovhele Midiyavhathu Kennedy Tshivhase, vho zwa zwauri murangaphanḓa muswa wa sialala vha tea u ṱhonifha tshitshavha tshavho na u thetshelesa vhahulwane musi vha tshi vha eletshedza. "Hu na murero wa Tshivenḓa une wa ri, 'Vhathu ndi mapfura, vhaadoliwa,' zwine zwa amba uri vhathu vha fana na mapfura nahone vha fanela u farwa nga vhuronwane," vho zwa.
Vho ṱuṱuwedza murangaphanḓa muswa u sika mishumo nga kha mishumo ya dzi mveledziso ya tshitshavha. "Vha ḓo vha murangaphanḓa wa vhathu vhoṱhe vhane vha dzula muvhunduni wavho, vho pfumaho kana vhashai, nahone ndi vha humbela uri vha vhafare nga ṱhonifho nahone vha sumbedze vhuṱali havho," Vho Budeli vha amba.