Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Vhadzulapo vha muvhundu wa Dzwerani Mvelaphanda, muvhundu wo ṱanganaho wa mulalo tsini na Vuwani, wo sedzana na khaedu khulwane kha miṅwaha miraru yo fhiraho. U bva tshe murangaphanḓa wavho wa sialala, Vhamusanda Vho Mmbangiseni Tshimangadzo Vho Solomon Khangale vha dzama nga ṅwaha wa 2022 vhe na miṅwaha ya 70, khoro ya vhuhosi yovha i tshi khou langa mafhungo a muvhundu.
Naho zwo ralo, Mugivhela wo fhiraho wo vha tshifhinga tsha tshanduko kha vhadzulapo musi murangaphanḓa muswa wa sialala vha aniswa lwa tshiofisi.
Nga tshifhinga tsha vhuṱambo he ha vha ho ṱanganelwa nga vharangaphanḓa vha bvaho miḓini ya tsini na miraḓo ya vhadzulapo vha maḓana, Vho Mpho Khangale vho tiiwa sa murangaphanḓa muswa wa sialala muvhunduni uyo. Murangaphanḓa muhulwane Vho Thovhele Calvin Nelwamondo, vho vha vhe vhone vhane vha khou ita mushumo wa u vhea, vhavha ṋea dzina ḽa Vhamusanda Vho Ranwedzi.
Nga tshifhinga tsha vhuṱambo uho, Vho Collen Khangale vho tiiwa sa ndumi (muthusi wa murangaphanḓa wa muthu nga eṱhe), ngeno Vho Takalani Netshivhale vho vhewa sa khadzi (khaladzi a murangaphanḓa).
Kha nyambedzano na Limpopo Mirror nga murahu ha u a aniswa havho, Vhamusanda Vho Ranwedzi vho bvisela khagala bono ḽavho kha tshitshavha. Vho sumbedzisa mafhungo a dziṅwe dza dzi khaedu dzine vhadzulapo vha khou ṱangana nadzo, hu tshi katelwa na u shaya maḓi na bada dzi songo teaho. "Sa vhadzulapo vha vhupo ha mahayani, ri kha vhuimo vhu si havhuḓi musi zwi tshi ḓa kha mveledziso. U fana na miṅwe mivhundu u mona na tshiṱiriki tsha Vhembe, ri kha ḓi shaya tswikelelo ya maḓi, nahone bada dzashu dzi sia zwinzhi zwi tshi ṱoḓea," vha ralo.
Vho ombedzela ndeme ya u shumisana na mimasipala ya zwiṱiriki na mimasiapala yapo u itela u tandulula khaedu idzi. "Vhathu vhanga vha nga si kone u bvela phanḓa vha tshi konḓelela vhuleme uhu—u vha vha si na maḓi na bada dzo teaho—nga murahu ha miṅwaha minzhi nga u rali ya dimokirasi. Hezwi zwi fanela u shanduka. Vho tea u ḓiphina nga mbuelo dza mbofholowo yashu," vha amba.
Vhamusanda Vho Ranwedzi vho engedza nga uri mushumo wavho wa u thoma ndi u kwama khoro ya vhuhosi na vhaṅwe vha kwameaho vha ndeme u itela u bveledza pulane yo ṱanganelaho ya vhumatshelo ha muvhundu.