Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Muraḓo wa foramu ya vhupholisa ha vhadzulapo (CPF) vha fhaḽa Manamani, nnḓa ha Ṱhohoyandou, vho ṱhaselwa vha vhulawa hayani havho nga awara dza nga matsheloni a Mugivhela wa ḽa sumbe Tshimedzi. Hu khou humbulelwa uri ṱhaselo iyi ndi ya u ḓi lifhedzela.
Uya nga muofisiri wa vhudavhidzani ha mapholisa Vhembe, W/O Vho Vuledzani Dathi, vhari munna wavhane Vho Nnyawedzeni Matodzi, vhovha vhe hayani musi vha tshi pfa hu tshi khokhonywa vothini. Vhori vha tshi lingedza u ṱola uri ndi nnyi are nnḓa, vha ṱhavhiwa nga murahu ha nḓevhe nga tshihali.
Vho Matodzi vho ḓou shuluwa malofha lu shushaho, vha hwalelwa kiḽiniki ya tsini Shayandima he vha konou fhiriselwa vhuongeloni ha Tshilidzini, mashudu mavhi vha lovhela vhuongeloni.
Ho vulwa mulandu wa bulayo. "Muhumbulelwa ha ḓivhei zwa zwino, fhedzi ri khou zwimana navho," hu amba Vho Dathi.
Manwe a mavharivhari ane a khou leleḓa ndi a uri mavemu ayo e a ṱhasela Vho Matodzi ndi vhathu vhe vha vha na khuḓano na ṅwana wa Vho Matodzi wa muṱhannga, he muṱhannga uyo o vha levhela a shavha. Hu pfala uri mavemu aya vhori vha tshi ya muḓini wa Vho Matodzi vha vha vha khou zwimana na muṱhannga uyo, o touvha mashudu mavhi uri vho ḓou ṱangana na Vho Matodzi vha lifhedzela khavho.
Murangaphanḓa wa muvhundu uyo Vho Eulenda Sumbana vhari tshiwo itshi tsho shusha vhadzulapo. "Muvhundu hoyu wovha u na mulalo, hu sina vhugevhenga vhune kha khou vhigiwa, tshiwo itshi tsho ri shusha vhukuma," vha amba.
Khaladzi a Vho Matodzi, Vho Avhasei Matodzi, vhari sa muṱa vha pfa vho xelelwa nga zwe zwa itea, zwihulu ngauri Vho Matodzi vho vha vhe vhone muunḓi muhulwane afho hayani.
Ane avha na vhuṱanzi vhune ha nga thusa mapholisa kha u zwimana na muhumbulelwa vha nga kwama Vho sedzheni Humbulani Faith Siaga kha 076 620 7197 kana kha 015 960 1000.
Ṱhoho: