Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
U shandukiswa ha digiṱali he ha shandula nḓowetshumo ya muzika ho sia vhaimbi vhanzhi vha kale vha si na mishumo. Muṅwe wa vhenevho vhaimbi ndi murendi a ḓivheaho Lutendo Mathobo, ane a ḓivhiwa nga ḽa Damara kana Masimɓe kha vhatevheli vhawe vhanzhi.
Murendi we a kinda khapfufho nnzhi u bva Lwamondo Tshifulanani Fhasi ha Bada nnḓa nyana ha ḓorobo ya Thohoyandou o vha a tshi shuma nga tshifhinga tsha khasethe - tshifhinga tshe vhatsila vha vha vha tshi nga ḓitshidza nga nḓila yavhuḓi nga u rengisa. O bvisa aḽibamu dza sumbe phanḓa ha mushumo wawe wa zwenezwino, Tshigidi, nga 2022.
Fhedzi, nga u sa kona u ḓowela thekinolodzhi ya musalauno, o mbo ḓi ṱuwa kha nḓowetshumo, a amba nga ha khaedu dza u dzula a tshi khou tshimbila kha makete une wa langiwa nga u phaḓaladzwa ha didzhithaḽa. "Nḓowetshumo ya muzika yo shanduka vhukuma u bva kha tshifhinga tshashu tsha dzikhasethe, he ra vha ri tshi nga kona u ita tshelede nga vhuṱuku," ho amba Masimbe. O amba zwauri: "Musi dzi CD dzi tshi dzhena, vhathu vho mbo ḓi thoma u kopolola na u rengisa mushumo washu husina u tendelana vhukati havho na rine. Roṱhe ro vha ro sukumedzwa nnḓa ha mutambo, nahone hu si kale ro vha ri sa tsha kona na u rekhoda."
Tshiwo tsha u fhedzisela, u ri, tsho ḓa nga u bvelela ha mavhengele a muzika wa didzhithala, hune muzika wa dawuniḽoudiwa na u kovhelwa hu si na vhaimbi vhane vha wana mbadelo dzo teaho. "Zwenezwo zwo ita uri ndi dzhie phetho ya ṱutshela zwoṱhe ."
Fhedzi vhutshilo ho vha na dziṅwe pulani.
Muṱangano wa tshikhala na mutambi wa miswaswo a ḓivheaho, muhashi wa radio na muṱuṱuwedzi wa nyanḓadzamafhungo ya matshilisano Vhudzisani Mulaudzi - ane a ḓivhiwa khwine sa Vhudzi Li MC kana Alibaba - wo ṋea mutambi wa kale muya wa vhuvhili. Vhudzi o mukhuthadza uri asongo fhela mbilu, a mukhwaṱhisedza uri tshifhinga tshawe tshi kule na u fhela.
Zwino avha vhavhili vho no ṱangana nahone vha khou shuma kha album ntswa, zwine zwa khou bveledza buzz kha inthanethe.
"Ndi khou sokou takala uri, nga u ṱavhanya, Alibaba o dzhena vhutshiloni hanga," ho amba Masimbe. "Ri khou farakanea nga u bika ḓumbu. Arali ni kha zwileludzi zwa vhudavhidzani, khamusi no zwi vhona uri hu na zwithu zwihulwane zwine zwa khou ḓa. Vhafuni vha fanela u sokou lindela - zwa khwine ndi u bika!"
Vhudzi uri o aluwa a tshi thetshelesa murendi nahone zwo vhaisa musi a tshi pfa uri o ṱuwa kha zwa nḓowetshumo iyi. "Ndo vha ndi sa koni u humbula vhurendi hapo ndi si nae muhumbuloni. Nga murahu ha nyambedzano ya u ṱuṱuwedza, ro tendelana uri ri ḓo shumisana, nahone u bva tsheetsho ro sika tshithu tsho khetheaho. Ndo no mu ḓivhadza kha ḽifhasi ḽa didzhithala," o ralo.
Phindulo yo vha i tshi ṱavhanya nahone i tshi ṱuṱuwedza. "Ndo tamba nda posa zwiṅwe zwithu kha nyanḓadzamafhungo ya matshilisano, nahone hu sa athu fhela vhege, Masimmbe o vhidziwa fhethu huraru dza u tamba kha mbingano. Ndi takadzwa vhukuma nga nḓila ine zwithu zwa khou tshimbila ngayo."