Murendi wa Vendaboy u ḓo mbvumbvusa vhathu nga One Man Show ine ya khou ḓa

Tshiṱori nga Elmon Tshikhudo. Ṱhalutshedzo nga Khathutshelo Raliphaswa

Murendi a ḓivheaho wa Limpopo na muimbi wa thendo Vendaboy Poet o ḓiimisela u mbvumbvusa vhafuni vhatikedzi vhawe kha vhugalatenga nau sia vhafuni vha tshi khou ḽa nga tshanḓa tshawe musi a tshi khou ranga phanḓa vhuṱambo hawe ha One Man Show ine yo lavhelelwa vhukuma nga vhanzhi.

Vhuṱambo uhu, ha vhuvhili ya nḓila iyi, vhuḓo farelwa ḽaiburari ya Thulamela ngei Thohoyandou nga ḽa 18 Nyendavhusiku, u bva nga awara ya 17:00. Kha vhaṅwe vhatikedzi vhane vha ḓo mbvumbvusa vhathu nga ḓuvha ḽeneḽo hu na muimbi wa nṱhesa na murendi ane a pfi Burning Saul Nephawe, Vho Solly Ramatswi, Murendi wa Ntsako, Murendi Landa, na Tshigwada tsha Vhuisa Sialala.

Murendi we a kunda kha pfufho, we a rendela Muphuresidennde Vho Cyril Ramaphosa luvhili, o ri vhuṱambo uhu vhu fana na mushumo wa mafhelo a ṅwaha hune a ḓo vha a tshi khou pembelela na u vala ṅwaha nga tshitaila na vhafuni vhatikedzi vhawe.

"Vhathu vha ḓi lugisele vhusiku vhu sa hangwei ha vhurendi, muzika, na u pembelela mvelele. Iḓani ni tshenzhele vhurendi ha thendo vhu re na maanḓa, muzika u ṱuṱuwedzaho muya, u anetshela zwiṱori zwa mvelele ya Venḓa, na thero dzi ṱuṱuwedzaho dza vhuḓiṱalusi, mvelele, na u konḓelela. Nga hetshi tshifhinga, ndo ṱomola thambo kha vhaṅwe vha vhatambi vha nṱha vhapo uri vha ḓe vha kovhekane tshiṱeidzhi na nṋe," a amba.

Vendaboy o ramba vhadzulapo uri vha ḓigeḓe nga tshifhinga tsha vhuṱambo na u ḓiphina vhe nae. "Ṅwaha uno, i ḓo vha khulwane nahone yo khwiniswa, nga maanḓa yo itelwa vhafuni vhanga," a engedza.

Vendaboy o isa phanḓa na u sumbedzisa zwauri vhuṱambo uhu ndi ha ndeme vhukuma. "Vhuṱambo vhu pembelela mvelele na vhufa ha vhavenda ngeno i tshi khou vhulunga u anetshela zwiṱori na vhurendi ha sialala. I dovha ya ṋea tshikhala tsha u ṋea vhupfiwa ha matshilisano na u elekanya. Vhathu vha ḓo tshenzhela vhupfumi ha vhurendi na mvelele ya vhavenḓa. Ndi a ni fulufhedzisa noṱhe ni ḓo ṱuṱuwedzwa nga mushumo wa maanḓa une nda ḓo mbvumbvusa vhathu nda dovha nda foda na zwifanyiso na vhafunivhatikedzi vhanga," a amba.