Nganea vhutshilo. Ṱhalutshedzo nga Khathutshelo Raliphaswa.
Musaukanyi waza mitambo wa kale wa Phalaphala FM na mugidimi wa tshikhala tshilapfu Vho Nelson Azwimmbavhi Nyatheli (54) vho sia ifa ḽine ḽa ḓo konḓelela mirafho na mirafho i tevhelaho. Vhuḓipfi uhu ho ṱanganedzwa nga murangaphanḓa wa sialala wa kusi kwa Tshilapfene, Vhamusanda Vho Shandukani Livhuwani Tshivhase, nga tshifhinga tsha mbulungo ya Nyatheli nga Mugivhela, ḽa 7 Nyendavhusiku. Vho-Nyatheli vho lovha nga Lavhutanu ḽa 29 Ḽara.
Vho-Tshivhase vho ṱalusa Vho-Nyatheli sa muthu we aḓi ṋekedza tshifhinga tshawe tshinzhi na maanḓa awe kha mitambo, u fana na rugby. "Vhovha vha tshi ṱalutshedza rugby nga vhuḓalo kha radio lwe zwa vha zwi tshi leluwa uri muṅwe na muṅwe a i pfesese. Vho vha na mushumo wa ndeme kha u fhelisa muhumbulo wa uri rugby ndi mutambo wa vhatshena fhedzi nga u u ḓivha na u kovhelana nḓivho yavho na vhathu. U bvelela ha lushaka ṋamusi zwi kolodwa zwinzhi nga miṋeelo yawe. Vho vha vhe muthu muhulwane u fhira vhutshilo ane ifa ḽavho ḽa ḓo bvela phanḓa na u ri ṱuṱuwedza uri ri vhuedzedze kha zwitshavha zwashu," Vho Tshivhase vha amba.
Muhashi wa kale wa zwa mitambo kha Phalaphala FM Vho Tovhowani Eric Lugudu na vhone vho hulisa Vho Nyatheli musi vha tshi khou ita nyambedzano kha radio. "Naho vhovha vhe na vhutsila ha u saukanya bola ya milenzhe, vhovha vha tshi kona vhukuma kha rugby, u swika hune vha kona u ṱalutshedza zwidodombedzwa zwoṱhe hu si na vhuḓidini. Ndo fhedza ndo pfesesa rugby zwavhudi nga nthani havho. Ro xelelwa nga lidzhakanḓila kha mitambo vhane ra ḓo dzulela u vha elelwa ."
Nyatheli, vhe vhavha vha tshi ḓivhiwa nga dzina ḽa "Vhakalaha," vhovha vhe mugidimi wa tshikhala tshilapfu o bvelelaho. Kha nyambedzano ya 2020 na Limpopo Mirror, vho vhudziswa nga ha u kuvhanganya havho mimendele. "Hu na mendele nnzhi vhukuma; Ndo no xelelwa nga mbalo. Ndi sokou dzi kuvhanganya nda dzi vhea zwavhuḓi nga murahu ha mbambe iṅwe na iṅwe," vha amba.
Sa muraḓo wa Kiḽaba ya u gidima ya Murray and Roberts, Vho Nyatheli vho shela mulenzhe kha mbambe dzo vhalaho zwa tshikhala tshilapfu, hu tshi katelwa mbambe ya Johnson Crane, mbambe ya Soweto na mbambe ya Two Countries.
Vho bebwa na u alutshela Tshilapfene Haradali, Vho Nyatheli vho dovha vha vha mutumbuli wa tshigwada tsha Friends of Frans Rasimphi High School, dzangano ḽe ḽa thomiwa nga vhagudiswa vha kale u itela u maanḓafhadza vhagudiswa tshikoloni itsho. Tshigwada tsho pennda hafhu zwipiḓa zwa zwifhato zwa tshikolo, tsha ṋeela dzi khomphyutha, shelufu, na yunifomo kha vhagudiswa vha shayaho.
Murwa wa Vho Nyatheli, Mutali, o sumbedza vhuṱungu hawe vhuhulwane nga u xelelwa nga khotsi awe nga u ṱavhanya. "Ro vha ri songo vhuya ra lavhelela uri zwenezwi zwi ḓo itea nga u ṱavhanya nga u rali, nahone ri kha ḓi vha ro tshuwa. Zwi tounga muṅwe muthu u ḓo mvusa a mmbudza uri zwothe ndi muloro muvhi. Vhovha vhe khotsi vha lufuno vha tshi dzula vhe hone kha riṋe, nahone u savha hone havho zwi tshi ḓo sia tshikhala tshine tsha nga si vhuye tsha ḓadzwa," a amba.
Nga tshifhinga tsha u lovha havho, Vho Nyatheli vho vha vha tshi shuma kha tshipiḓa tsha u renga kha Murray na Roberts kha Maini wa De Beers Venetia. Vho sia mme avho Vho Masindi, mukomana wavho Mutali, ṅwana wavho wa musidzana Masindi, na vharathu vhawe vhavhili.