Tshiṱori nga Silas Nduvheni. Ṱhalutshedzo nga Khathutshelo Raliphaswa.
Rinngi ya Thohoyandou yo dzhiaho tshifhinga tshilapfu fhano Limpopo tshetshavha tsho vhtshewa tsho wana masheleni o engedzwaho a R50 miḽioni, zwine zwa ita uri vhubindudzi hoṱhe kha mushumo vhu vhe vhu ṱoḓaho u vha R350 miḽioni. Mulangavundu wa Limpopo Vho Dokotela Phophi Ramathuba vho divhadza u kovhekanywa huswa nga tshifhinga tsha vhutambo nga Lavhuvhili, musi vha tshi khou netshedza mushumo kha ra konṱiraka muswa.
"Masheleni o engedzwaho a a ṱoḓea u itela u vhona uri u fhedza, nahone a ri nga ḓo tendelana kha vhuimo fhano," ho amba Muphirmia Vho Ramathuba. "Mushumo uyu wa R50 miḽioni u tea u fhela nga tshifhinga. Ndi humbela zwitshavha uri zwi tendele rakonṱiraka u thola vhaḓivhi vha re na vhukoni uri vha ite mushumo."
Yo thomiwa nga Lambamai 2011, tshiimiswa tsho thoma u fhela nga 2015 fhedzi tsho dzula tshi songo fhelela nga ṅwambo wa mafhungo a tshivhumbeo na u lenga. Nga 2024, ho vha na dziṅwe R16 miḽioni dzo ṋetshedzwaho u itela u tandulula vhukhakhi na u vhona uri tshiimiswa tshi nga kona u swikelela zwilinganyo zwa tsireledzo. Naho ho vha na vhuḓidini uhu, vhuimo ha thekhisi na bisi dza musalauno vhu kha ḓi ḓo vha hone, vhaendelamashango vha dinaho na vhadzulapo nga u fana.
Mulangavundu Vho Ramathuba vho khwaṱhisedza tshitshavha uri tshiimiswa tshi ḓo vha tsho no lugela nga ṅwedzi wa Lambamai ṅwaha u ḓaho nahone vha ombedzela uri ndi vhakonṱiraka vha re na tshenzhemo na vha re na bvumo fhedzi vhane vha ḓo tendelwa u fhedza mushumo. "Ro kwamana na nḓowetshumo ya u fhaṱa, nahone tsedzuluso yo fhelelaho nga khamphani ya vhuinzhiniere ya phurofeshinaḽa yo ri ṋea ṱhanziela ya u ḓitika nga tshivhumbeo. Ndo ḓikumedzela u fhungudza riboni nga ṅwedzi u ḓaho wa Lambamai," vho ralo.
Mulangavundu vho fhelekedziwa nga MEC wa Mishumo ya Tshitshavha na zwifhaṱwa Vho Ernest Rachoene; MEC wa Vhuendedzi na Tsireledzo Tshitshavhani Vho Violet Mathye; Nedorobo kha masipala wa Tshiṱiriki tsha Vhembe Vho Freda Nkondo; na murangaphanda wa sialala Vho Thovhele Gole Mphaphuli nga tshifhinga tsha u kumedzana.
Ṋeḓorobo Vho Nkondo vho amba uri u bvela phanḓa ha u fhaṱa zwi ḓo ṱuṱuwedza mveledziso yo ṱavhanyiswaho kha tshiṱiriki. "Kha mukonṱiraka o vhewaho, ri vhea fulufhelo ḽashu kha inwi. A ni khou fhaṱa tshiimiswa fhedzi; ni khou fhaṱa fulufhelo nau vhuedzedza fulufhelo kha vhathu vha Vhembe," vho ralo.
Thovhele Gole Mphaphuli vho sumbedza u takala havho nga fulufhelo ḽa uri tshiimiswa tshi ḓo shuma. "Zwi nṋea dakalo ḽihulwane ḽa uri modele washu wa vhuendi wa kale u ḓo vha wo ḓiimisela u shumela zwitshavha u mona na Vhembe," vho ralo.
Tshiimiswa tsha R350 miḽioni, tsho itelwaho u vha habu ya vhuimo ha nṱha ya dzibisi na thekhisi kha Masipala Wapo wa Thulamela, tsho vha tsho lavhelelwa sa tshilinganyo tsha miṅwe mimasipala u mona na Limpopo. Fhedziha, u lenga u dovholola na u gonya ha ṱhuṱhuwedzo zwo ita uri hu sasaladzwe vhadzulapo na mahoro a hanedzaho, vhane vha amba uri masheleni o vha a tshi nga shumiswa kha dziṅwe ṱhoḓea dza themamveledziso dzine dza khou tsikeledza.