Tshiṱori nga Maanda Bele. Ṱhalutshedzo nga Khathutshelo Raliphaswa.
Musi e na miṅwaha ya 21 fhedzi, Mufenyi Thuhadini Maboho a bvaho Tshitavha, Nzhelele, o no ḓiitela dzina kha ḽifhasi ḽa radio na vhumbvumbvusi.
Maboho o alutshela Gondeni, Hamavhunga, fhedzi nga ṅwaha wa 2009 o ḓou fanela u pfulutshela na makhulu wawe nga ṅwambo wa zwiimo zwo fhambanaho zwa muṱa. Khotsi awe vho lovha nga murahu ha ṅwaha, nahone mme awe vho vha vha tshi tikedza muṱa nga u rengisa zwiḽiwa nahone nga murahu vha ḓou thoma u shuma u kunakisa Emperor's Palace.
O amba uri o guda ndeme ya u konḓelela kha mme awe, vhe vha vha na vhulwadze hau oma lurumbu nga 2018 nahone vha lovha nga ṅwedzi wa Ṱhangule 2024. "Maipfi avho, Ndi khou konḓelela uri nivhe na vhumatshelo ha khwine, dzulani na nṋe ," hu amba Maboho.
Nga murahu ha u maṱiriki nga 2020 na thero mbili dzo kundelwaho u phasa, o ṅwalisa kha Akhademi ya Mbula ngei Makwarela nahone a fhedza ngudo dzawe nga nḓila yo bvelelaho nga Fulwi 2021. Nga 2024, o thoma u guda zwa luambo kha Yunivesithi ya Thekinoḽodzhi ya Tshwane (TUT).
Lufuno lwawe lwa u amba na u mbvumbvusa lwo tumbulwa tshikoloni ekha murole wa nṱha musi mudededzi wawe wa Luisimane, Vho Masengane, vha tshi mu ṱuṱuwedza uri a vhale tshirendo. Tshifhinga tshenetsho tsho vusa lufuno lwa u amba khagala na vhurendi. Nga 2022, o ḓi-ganḓisa bugu ya vhurendi ine ya pfi Bandaids & Butterflies, naho mushumo wo fanela u imiswa nga ṅwambo wa vhuleme ha zwa masheleni kha sia ḽa Mufhenyi.
O ḓiimisela u dzhena kha khasho, o rumela kasethe ya udo rekhoda lwa tshifhinga tshi pfufhi kha Tshwane FM nga Phando 2024. Tshiṱitshi tsho mu dzhia, nahone nga ṅwedzi wa Ṱhafamuhwe, o vha a tshi khou vha na mbekanyamushumo ya Swondaha. Nga ṅwedzi wa Nyendavhusiku, o huliswa he a mboḓi ṋewa tshikhala tshau hasha mbekanyamushumo ya masiari – tshikhala tshihulwane kha mushumo wawe wa zwa u hasha kha radio.
Maboho zwino u linganisa ngudo dza tshifhinga tshoṱhe na mushumo wawe wa radio. U shumisa luvhanḓe lwawe u itela u tikedza vhaswa vha vharema na u ita khuwelelo kha vhahashi vha kale uri vha eletshedze murafho u tevhelaho. O ri: "Vhukoni vhu fanela u vha ho eḓanaho u itela u ri vulela mahothi nga vhunzhi."
O dovha a pulana u dzhena kha zwa podcasting, a tshi shumisa ipfi ḽawe u anetshela zwiṱori na u bvisela khagala mafhungo ane a kwama vhaswa Afrika Tshipembe ngau angaredza.