Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
U fhira fhano shangoni ha Mutambi wa matambwa Ndivhuwo Munyai zwo tou vha ndozwo kha nḓowetshumo ya vhumbvumbvusi na vha muṱa khathihi na vunḓu ḽa Limpopo ngau angaredza nau fhira.
Munyai o vha a tshi ḓivhea nga madzina o fhambanaho a tshiṱeidzhi e a a dzhia kha matambwa au fhambana, u fana na madzina; Mareda, Major 11, Vhafunzi Vho Lufhaho, na Major 100. Vho lovha nga Mugivhela wa la furaru Ḽara musi mureili wa tshiendedzi tshe tshavha tshi tshi khou vha endedza na vhaṅwe vhathu vha si gathi vha tshi xelelwa nga ndaulo, he goloi iyo ya mboḓi ḓi ṱomola lunzhi-lunzhi. Ndi ene fhedzi we a lovhela henefho he khombo ya bvelela hone, ngeno vhaṅwe vhaṋameli vhaṱanu vho gidimiselwa vhuongeloni vho huvhala lu tafisaho.
Khombo iyi yo itea Hamabidi, tsini na Vuwani, nga Mugivhela nga masiari
Munyai u ḓo humbulwa nga nḓila ye a sumbedza ngayo nga vhuronwane mishumo minzhi kha matambwa a radio, dzifilimu, na tshiṱori tshi takalelwaho tsha Phalaphala FM Ndi Yone Mini Yeneyi. Ḽitambwa iḽo, line lavha na minwaha yo vhalaho i tshi khou bvelela muyani, yo vha i tshi khou sumbedza ene mufunzi ane a khou ḓisa khanedzano Vhafunzi Vho Lufhaho.
Muambeli wa muta vhafunzi Vho Piet Nemudzivhadi vho talutshedza lufu lwavho sa tshinyalelo i vhaisaho vhukuma. "Hetshi ndi tshifhinga tshi ṱungufhadzaho kha riṋe sa muṱa na kha muṱa wawe wo ṱanḓavhuwaho u mona na shango. Lufu lwawe lwo ri mangadza. O vha a kha muya wavhudi musi a tshi bva hayani nga matsheloni a Mugivhela a sa ri vhudzi na uri u khouya ngafhi. Ho vha hu nga masiari fhedzi musi ri tshi ṱanganedza luṱingo lu vhaisaho lu tshi ri ḓivhadza nga ha u lovha hawe," vha amba.
Vho Nemudzivhadi vho engedza nga uri vhukoni ha Munyai na lufuno lwawe lwa theatre na vhutsila a zwi hanedzei. "Ri kha ḓi lwisana na lufu lwawe. Musi ri tshi khou amba, ri kayi na u lugiselela mbulungo yawe. Uḓo vhulungwa mavhiḓani a henefho Ramukhuba nga Mugivhela, ḽa sumbe Nyendavhusiku," vha amba.
Mutambi ngae Jeanette Mafadza, we a tamba tshipiḓa tsha Phiriphiri, khaladzi a mutambi o fhiraho shangoni kha ḽitambwa ḽa Ndi Yone Mini Yeneyi, o ri lufu lwa Munyai lwo mu kwama vhukuma. "Ro thoma sa vhatambi nga riṋe, fhedzi nga u ya ha tshifhinga ro mbo ḓi vhofhekana sa vhana vha malofha. Vhege mbili dzo fhiraho, ro vha ri tshi khou kanḓisa roṱhe nahone ra ita na u dzhia zwifanyiso. Ndo vha ndi sa zwi ḓivhi uri hu ḓo vha rekhodo yashu ya u fhedzisela. Ndi ḓo mu elelwa misi yoṱhe," a amba.
Vho Ndavheleseni Mavu Nebulu, vhe vha shuma na Munyai kha mushumo wavho wa zwenezwino, vho vha vhe tsini na u bvisa miṱodzi. "Ro vha ri tshi kha ḓi tou bva u fhedza u kanḓisa fiḽimu ntswa ine ya vhidziwa Mukwasha nga Ḽavhuṋa ḽo fhiraho. Zwi a vhaisa mbilu uri ha ngo tshila u itela u zwi vhona muyani. Ndo shuma na Munyai kha mishumo minzhi, nahone o vha a tshi dzulela u takadza u shumisana nae. O vha a tshi kona u dzhena zwavhuḓi kha mushumo naho u ufhio. Kha Mukwasha, o vha a tshi tamba sa vhakoma e tsini na murangaphanḓa muhulwane wa sialala. Lufu lwawe lwo ri dzhiela munna a re na vhukoni vhuhulwane vhukuma," vha amba.
Ndivhuho Brilliance Munyai o bebwa ngei Hanesengani Tshifhefhe, tsini nyana na Vuwani, nga ḽa 24 Fulwi 1992. O fhedza murole wa vhufumi na vhuvhili tikoloni tsha nṱha tsha Kolokoshani nga 2012. A thoma mushumo wa u tamba matambwa khathihi na vhatambi vha re na vhukoni vhu vhonalaho sa KK u bva Muvhango, ane na ene a bva kha vhupo ha Hanesengani.