Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Muṱa wa mutukana wa miṅwaha ya 14 ane ha pfi o ḓifhirisa fhano shangoni vha amba uri vhuṱungu hau xelelwa ngae ndi vhuhulu vhukuma.
Madembe Lucky Nkosi, mugudi wa murole wa 9 tshikoloni tsha sekondari ya Thivhilaela ngei Maniini, hu vhigwa uri o haṱula vhutshilo hawe nga u ḓi nembeledza nfa thambo. Tshiwo itshi tsho itea ngei Maniini nga Musumbuluwo, nga ḽa 7 Lambamai 2025, nga awara ya 08:00.
Khaladzi awe, Vho Thanzi Nkosi, vha ri muṱa wo vuwa nga matsheloni eneo u itela u lugisela tshifhinga tshavho tsho ḓoweleaho tsha thabelo ya thavhani. "Ndi nga hetshi tshifhinga he Madembe, we a vha a tshi khou ḓilugisela u ṱuwa na muṱa woṱhe, a vhudzisa nga ha R50 ye a i vhulunga nḓuni ye a amba zwauri yo ngalangala," vho ralo. Zwi vhonala uri o vha o dzudzanya u shumisa tshelede iyo kha lwendo lwa u ya dzithavhani.
"A huna muthu ano vhonala a tshi zwi ḓivha, ro mu sia a tshi khou lila nduni. Ro mbo ḓi ṱanganedza lutingo lwa uri o dzhia vhutshilo hawe, ha ngo vhuya a gungula nga tshiṅwe tshithu nga nnḓa ha tshelede yawe yo ngalangalaho. Lufu lwawe lwo ri sia ri na mbudziso nnzhi na u tou humbulela nga ha R50," vho ralo.
Thanzi o ṱalusa Madembe sa mutukana ane ovha e na mikhwa hone ovha a tshi funa pfunzo dzawe.
O vhulungwa mavhiḓani a henefho nga Mugivhela, ḽa 11 Lambamai. Mbulungo yawe yo vha yo dzhenelwa nga vhagudi vhanzhi na vhagudisi vha tshikolo tsha sekondari tsha Thivhilaela, khathihi na mirado ya tshitshavha vha tshi mu fhelekedza hayani hawe ha tshoṱhe.
Muṱuṱuwedzi wa pfunzo vha ḓivheaho vhukuma, Vho Murendeni Ndanduleni - vha ḓivhiwaho nga nḓila ya khwine sa Musanda Musanda kha zwigwada zwa pfunzo - na vhone vho dzhenela mushumo wa mbulungo. Vho amba uri vho thoma u tikedza muṱhannga nga yunifomo dza tshikolo na zwiṅwe zwithu zwa ndeme nga murahu ha u dalela tshikolo ṅwaha wo fhiraho.
Musi vha tshi amba kha mbulungo, vho amba uri nḓila ya khwine ya u hulisa muhumbulo wa Madembe ndi ya uri vhagudi vha Thivhilaeli vha gude nga maanḓa na u bveledza mvelelo dza vhuimo. Vho dovha vha ṱuṱuwedza uri vha iledze zwa vhudzekani, zwidzidzivhadzi na halwa sa tshiṱhavhelo tsha mutukana.