Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Hono fhela miṅwedzi miraru ho wanala tshitumbu masimuni a Tshiozwi, he mapholisa vhovha vha khou humbula uri ndi Susan Mainganye Mufamadi. Vha muṱa wa ha Mufamadi kha kusi kwa Ha-Madodonga, vhuponi ha Ha-Kutama, vhari vho pfa vho rulea hutshi vhuya mvelelo dza ndingo ya DNA dze dza khwaṱhisedza uri na ngoho tshitumbu ndi tsha Susan Mainganye Mufamadi. Tshitumbu tsho wanala nga ḽa fumithihi Lambamai.
Susan wa minwaha ya fumbilirathi o ngalangala nga ḽa rathi Lambamai ṅwaha-uno nga murahu hau vhidzwa nga munna we avha a khou seisana nae, u bva afho hango dovha a vhonala a tshi vhidzwa a tshilaho. Khotsia Susan Vho-Joseph Mufamadi, vhari vho founelwa nga mapholisa nga murahu ha maḓuvha Susan a sa vhonali uri vhaḓe u khwaṱhisedzwa uri tshitumbu tsho wanalaho masimuni ndi tsha Susan kana hai. Fhedzi ngauri tshitumbu tshovha tsho no tshinyala, vho balelwa u khwaṱhisedza sa izwi na khofheni hovha husa vhonali zwavhuḓi na zwiambaro vha sa koni uzwi ṱalusa zwavhuḓi. Ngau vhona izwi, mapholisa vho dzhia tsheo yau ita ndingo dza DNA, he tshitumbu tsha Susan tsha dzula mutsharani vha muṱa vho lindela mvelelo uri dzi khwaṱhisedze vhusaka ha vha ha Mufamadi na tshitumbu tsho wanalaho.
Nga ḽa fumbilirathi Fulwi, mvelelo dzo vhuya dzi tshi khwaṱhisedza ri na ngoho tshitumbu itsho ndi tsha Susan. Vha muṱa vhari vha pfa vho rulea uri vha ḓo kona u bvela phanḓa nau dzudzanya mbulungo ya ṅwana wavho.
Vho-Mufamadi vhari lufu lwa ṅwana wavho lwo sia muṱa wavho wo kwashekana muyani, hone vha khou balelwa u ṱanganedza nḓila ye a vhulawa ngayo. "Tshifhinga tshe ra fhedza ro lindela dzi mvelelo tshovha tshi konḓaho kha muṱa washu, fhedzi zwa zwino ro wana mulalo hone ri ḓo mufha mbulungo yo mu fanelaho," vha amba.
Masimuni a vhupo uho, ho wanala tshitumbu tsha Lungisani Phosa, mugudiswa wa murole wa vhufuni nga ḽa fumbiliraru Phando ṅwaha-uno. We avha atshi dzhena kha tshikolo tsha nṱha tsha Manaledzi. Fhedzi ahuna muthu ono farwaho kha milandu iyi.
Vhamusanda Vho-Ntanganedzeni Kutama vhari vhadzulapo vho vhaisala u fana na vha muṱa hone vha fulufhela uri mudzimu u ḓovha navho kha tshifhinga itshi tshi konḓaho. Vha dovha hafhu vha humbela uri vhathu vhane vha ngavha na zwine vha ḓivha kha milandu iyi, vha lume mapholisa nḓevhe uri vhaiti vhazwo vha dzhielwe vhukando ho fanelaho. "Ri khou lingedza nga hune ra kone uri vhathu vhavhe na nḓivho ya vhugevhenga vhune ha khou itea vhuponi havho. Fhedzi mapholisa ahuna zwine vha khou itea nga vhugevhenga vhune ha khou itea. Ri vhonala sa vhathu vhane vha khou lwa nndwa ine aringa ḓoi wina ngazwo vhathu vha tshi fhumula nga vhugevhenga vhune vha vhona vhu khou itea," vha zwa.
Susan u ḓo vhulungwa nga Mugivhela wa ḽau thoma ḽa Fulwana, Ha-Madodonga. Mushumo uḓo thoma nga awara ya vhurathi matsheloni.