Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Mvula ya mafhelo a vhege yo fhiraho ine yovha yo lavhelelwa nga vhunzhi ha vhathu u ḓisa u vhofholowa nga murahu ha tshifhinga tshilapfu tsha gomelelo nau omaho ha vhuria, fhedzi yo ḓou shanduka ya vha khombo kha vhadzulapo vhanzhi vha vhupo vha mahayani. Maḓumbu o Khwaṱhaho na mimuya mihulu zwo vha zwi tshi khou ṱhaṱhuvha miḓanani, zwa tshinyadza mahaya na u sia miṱa i kha vhuleme.
"Ri kha ḓi vha ro tshuwa na u pfa masiandoitwa a khombo," ho amba murangaphanḓa wa tshitshavha tsha Tshikambe Vho Avhapfani Ramakuela. "Miṱa i fhiraho fumbili ina yo vha yo kwamea, nahone miṅwe yo salaho i shaya."
Ngei Duvhuledza na Tshikambe, nnḓa ha Thohoyandou, miri yo tupulwa midzi, thambo dza muḓagasi dzo wa nga vhunzhi zwa thithisa nḓisedzo ya muḓagasi, na ṱhanga dzo kherukanaho dzi nnḓuni dzo siaho miḓini minzhi hu na u tambula nga vhunzhi.
Maḓumbu o thoma nga Ḽavhuṱanu, ḽa fumisunbe Tshimedzi zwi songo lavhelela na luthihi. Maḓumbu na mvula idzo zwo tshinyadza vhukuma vhupo hoṱhe.
"U tshinyadzwa ho vhangwaho ho kalula. Kha tshiṅwe tshiitea, makhulu vho dzhakea nge nnḓu yavho ya kamara mbili yo tshinyadzwa. Zwiṅwe zwipiḓa zwa muḓi zwo vha zwo sala swiswini nga murahu ha musi thambo dza muḓagasi dzo tshinyadzwa. A ro ngo vhona tshithu tshi ngaho hetshi kha heḽi sia," vha ralo.
Vho engedza nga uri masipala wo kwamiwa na uri mukhantseḽara wapo o vha o no ḓisa maipfi a khuthadzaho nga tshivhumbeo tsha phasela dza zwiḽiwa na zwiṅwe zwishumiswa.
"Ri a zwi ḓivha uri vhaṅwe vha vhadzulapo vho kona u lugisa nnḓu dzavho, fhedzi ri kha ḓi ṱoḓa thuso sa izwi vhunzhi ha avho vho kwameaho vha sa shumi," Vho Ramakuela vho ralo.
Muṅwe wa vhadzulapo vho kwameaho vhukuma, Vho Hudson Thagwana, vhovha vho fhufhelwa nga ṱhanga ya nnḓu yavho.
"Ho vha hu nga vho 19:30 musi ndo dzula pherani ya nnḓa musi ndi tshi pfa maḓumbu mahulu a tshi takuwa. Ndo vha ndi sa koni na u ya nḓuni khulwane. Nga u ṱavhanya, ṱhanga ya nnḓu khulwane yo vha i si tsheeho. Musi mvula i tshi fhela, zwoṱhe zwo vha zwo tshinyala. U tshinyadzwa ho vhangwaho hu na ndeme ya zwigidi, nahone a thi ḓivhi uri ndi ḓo kona hani u i dzhiela vhudzulo. A thi khou shuma u bva tshe nda retrenched nga tshifhinga tsha Covid. Ro wana zwiṅwe zwiḽiwa zwi bvaho kha mukhantseḽara washu, fhedzi ri ḓo ṱanganedza iṅwe nḓila ya thuso u itela u leludza nyimele yashu," vha ralo.
Muambeli wa masipala wa Tshiṱiriki tsha Vhembe Vho Moses Shivambu vho khwaṱhisedza uri ho ṱanganedzwa mivhigo ya u tshinyadzwa.
"U swika zwino, ro wana mafhungo a uri miṱa ya fumalo malo yo kwamea. A si tshivhalo tshoṱhe sa izwi vhaofisiri vhashu vha tshi kha ḓi shuma minwe mishumo i yelanho na tshinyalelo iyi. Mimasipala yashu i khou ita vhudzheneleli vhu ṱoḓeaho kha masia avho. Ri ḓo ṋea akhaunthu yo fhelelaho nga u ṱavhanya musi vhaofisiri vho no fhedza u ṱola," vho ralo.