Tshiṱori nga: Maanda Bele & Ṱhalutshedzo nga: Raliphaswa Khathutshelo
Vho no ḓi vhudzisa uri na ṋama ya Mvuvhu i ḓifha hani? Vhadzulapo vha Ha-Makhuvha, tsini na khotho ya Maṱatshe, vho dzhia tsheo yau sedzulusa izwo nga murahu hau vhulawa ha Mvuvhu ye yavha i tshi shushedza vhadzulapo nga vhashumi vha muhasho wa mveledziso ya Ikonomi, Vhupo na Vhuendela mashango (LEDET).
Iyo Mvuvhu yo thuntshwa nga Ḽavhuṋa ḽa vhege yo fhiraho (9 Ṱhafamuhwe), ṋama yayo ya kovhekanwa vhadzulapo. Vhanwe vha i bika, vhanwe vha ita muhwaba (mukoki) ngayo.
Mvuvhu yovha i tshi vhonala i tshi khou buḓabuḓa nḓilani lunzhi, fhedzi i tshi anzela u gidimela mulamboni wa tsini. Muambeli wa LEDET, Vho-Zaid Kalla vhari iyo Mvuvhu yo vhigiwa, fhedzi vho balelwa u i wana nga vhege yau thoma ya u i ṱoḓa. "Vhashumi vhashu vho fanela u sedzesa iyo Mvuvho yo vhigiwaho lunzhi, u swikela vha tshi i wana vha i vhulaha Ḽavhuṋa ḽo fhiraho. Ṋama yo neiwa vhadzulapo kha kusi uko," hu amba Vho-Kalla.
Mashudu Mamidza, munwe wa vhadzulapo vhe vha thusa u ṱhavha iyo Mvuvhu khulu, uri vhadzulapo vhovha vha tshi ofha u tshimbila vhusiku nga u ofha iyo Mvuvhu. "Rovha ri tshi pfa ri songo tsireledzea ngauri rovha ri tshi ṱangana na nayo yayo khulu dza iyo Mvuvhu hoṱhe, hone i tshi tshinyadza zwiliṋwa zwashu. Ri na mavhele na mafhuri kha kusi kwashu. Mvuvhu yovha i tshi khou ḓisa tshinyadzo kha tsimu dzashu."
Mamidza uri o takala uri yo waniwa hone vho i vhulaha. "Na nne ndo ṱanganedza ṋama ya iyo Mvuvhu. Ṋama yayo yovha i thethe nau ḓifha u nga ya Kholomo, fhedzi, ṋama ya Mvuvhu ia ḓifha u fhira ya Kholomo. Ndi khou ḓiphina nga ṋama iyi ahuna na khakhathi. Mulovha ndo lalela nga muhwaba (mukoki) wayo na vhuswa," u ralo.
Kalla o humbudza vhadzulapo uri vha songo zwima phukha dzine dza huvhadza nga vhone vhane. "Arali ha wanala phukha i tshi khou buḓabuḓa kusini, vhathu vha tea u vhiga kha vhaḓivhi vha zwa dziphukha, hune afha kha Mvuvhu iyi, ndi Ṱhohoyanḓou," u amba Kalla.