Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Mualuwa vha bvaho Hamabidi kha vhupo ha Vuwani vho lozwa nnḓu yavho ya phera dza fumi-iṋa, moḓoro na ndaka yavho musi hu tshi ṱaha mulilo nga maḓautsha a Mugivhela wa ḽa fumbili rathi Tshimedzi.
Vho muṱa vho sala vhasina tshithu nga nnḓa ha zwiambaro zwe vhovha vho ambara nga tshifhinga tsha mulilo utshitaha. Vha khou humbela thuso kha vhathu uri vhavha thuse nga hune vha nga kona, hu ngavha nga zwiḽiwa, thundu dza nḓuni, zwiambaro, na zwishumiswa zwa u fhaṱa hafhu nnḓu yavho.
Vho Alfred Mabidi vha minwaha ya sumbe-thihi vhari vhovha vho eḓela musi vha tshi tou vuswa nga phosho ya musi hu tshi kwashea mafasiṱere na phosho i tshi khou bva kha garatshi ya mavothi mavhili. "Zwo pfala unga goloi i khou kwashiwa, ndo ḓou vuwa na zwenezwo, nda sedza nnḓa, nda vhona hu na tshedza muḓi woṱhe, hu tshinga ndi masiari," vha amba. Vho ḓou bvela nnḓa ha phera yavho vha tshi ya u sedza hune ha dzula mimoḓoro vha wana hu mulilo fhedzi, na vhutsi vhuhulu ho ḓala hanefho.
"Rovha ri vhaṱanu ngomu nḓuni, ra huwelela ri tshi ṱoḓa u ḓi tsireledza," vha amba. "Mulilo wovha wo sinyuwa zwe wa fhirela na kha dzinwe dzi phera, lune ro kundelwa u dzima mulilo uyo, naho ro thusiwa nga vhadzula tsini vhe vha ḓa u ri thusa." Vhari vho kundelwa u ṱanganedza zwe maṱo avho ovha a tshi khou vhona musi nnḓu yavho i tshi khou swa. "Ndo tou pfa unga ndi khou ḽora hezwi ndi tshi zwi lavhelesa husina zwine nda nga ita," vha engedza.
Vho tshumelo dzau dzima mulilo na mapholisa vho ḓou swika musi vha tshi vhidziwa afho muḓini. Uya nga muambeli wa mapholisa vha tshiṱiriki tsha Vhembe W/O Vuledzani Dathi, mapholisa vho vula mulandu wau fhisa, hone muthu muthihi ovha o vhidziwa mapholisani uri a vhudziseswe fhedzi a lungululwa nga murahu. Vho it na khuwelelo kha tshitshavha uri ane a ḓivha zwiṅwe zwine zwa nga thusa mapholisa a ise muvhigo mapholisani.