Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Ḓuvha ḽithihi phanḓa ha Khushumusi nga 2022, Washu Tshihume we a vha e na miṅwaha ya rathi nga tshenetsho tshifhinga o ngalangala hu sa ḓivhei he aya hone u bva Lamvi, kusi kune nga vhukule havha khilomithara dza 50 devhula-vhubvaḓuvha ha Thohoyandou. Nga murahu ha miṅwaha i fhiraho mivhili, mme awe vha kha ḓi lindela nga mbilelo u ḓivha zwe zwa itea kha mutukana wavho, nahone vha tenda uri muvhuso a u khou ita zwo eḓanaho u itela u mu ṱoḓa.
Vho Murendeni Manyatshe vho amba kha nyambedzano mafheloni a vhege o fhiraho uri vhaa bvisa mitodzi musi a tshi humbula mutukana wavho mutuku. Washu muṱuku o vha a tshi khou dalela makhulu wawe mubeba khotsi awe musi a tshi ngalangala nga nḓila i sa pfesesei musi a tshi khou tamba na vhaṅwe vhana. Naho miraḓo ya tshitshavha yo fhedza vhege nnzhi vha tshi khou ṱoḓa fhethu hoṱhe na miḓi ya tsini, a vhango wana mutukana.
Nga murahunyana ha musi o no ngalangala, makhulu wa Washu, Vho Tshilidzi Manyatshe, vho amba uri a vha nga ḓo vhuya vha vha na mulalo mbiluni dzavho u swikela vha tshi ḓivha zwe zwa itea kha muḓuhulu wavho.
"Nga murahu ha musi o no ngalangala, mapholisa vho ri fulufhedzisa uri vho thoma tshigwada tsha mushumo tsha vunḓu uri tshi sedze mafhungo aya, fhedzi muḓuhulu wanga u kha ḓi vha o ngalangala. A vha ri ḓivhadzi na nga ha ṱhoḓisiso dzavho. Ndi rabela uri ḽiṅwe ḓuvha, Mudzimu vha dzhenelele kha u ngalangala uhu hu sa pfali ha muḓuhulu wanga. Muṅwe muthu u tea u fhindula kha zwe zwa itea khae," vha ralo.
Vho Murendeni Manyatshe vha na vhuḓipfi vhu fanaho na havho nahone vho amba zwauri vho no fhedza ṅwaha u fhiraho muthihi vha sa athu pfa tshithu nga kha mapholisa. "Zwi vhonala u nga vho litsha u mu ṱoḓa," vha ralo, vha tshi khou ita khuwelelo kha vha mapholisa vha Afrika Tshipembe uri vha songo laṱela thaula kha mulandu uyu. Vho dovha vha humbela mirado ya tshitshavha tshapo uri vha kwame vhone kana tshiṱitshini tsha mapholisa tsha tsini arali vha na vhutanzi. Vho amba zwauri: "Naho a si tsha tshila, mmbudzeni uri o vhulungwa ngafhi."
Vho ita khuwelelo kha vhane vha ḓivha zwe zwa itea kha mutukana wavho uri vha mu vhuise, o lovha kana a tshi khou tshila. "Arali o lovha, ndi khou humbela uri ni ntsumbedze hune masalela awe a vha hone, uri ri kone u mu vhulunga nga tshirunzi," vha amba.
Muhulwane wa zwa vhudavhidzani kha SAPS ya Limpopo, Vho Brigadier Thulani Mashaba, a vho ngo wanala u wana vhupfiwa nga tshifhinga tsha musi ri tshi khou ya u ganḓisa.