Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Ndiliso dzi kati dza munnaavhane mubishopho a ḓivheaho Vho Rofhiwa Madzinge, zwi tshi tevhela u lovha havho kha khombo ya moḓoro ye ya itea kha gondo ḽa N1 ngei Gauteng nga Musumbuluwo, ḽa fumi-na-nthihi Ṱhangule.
Vho Madzinge vhovha vhe muhulwane wa tshivhidzo tsha Christian Worship Centre (CWC) ya davhi ḽa Piṱori. Vho wana khombo iyo ya moḓoro vha tshi khou humela Gauteng nga murahu ha u dzhenelela vhuṱambo he ha farwa kha tshivhidzo tsha Father's House Ministry ire Tshilamba. Vhuḓalo ha uri khombo yo bvelela hani kana yo vhangiwa nga mini, zwovha zwi sa athu u bviselwa khagala hu tshi anḓadzwa nga ha khombo iyo, hone vha muṱa vho humbela u ṋeiwa tshikhala tsha u lilela mufunwa wavho na u dzudzanya nga ha mbulungo ya mubishopho.
Muambeli wa vha muṱa, Vho Lutanyani Denga, vho khwaṱhisedza lufu lwa mubishopho. "Ri ḓivhadza vhathu nga ha u fhira fhano shangoni ha murwa washu a funeaho, mubishopho Rofhiwa Madzinge, e a lovha kha khombo ya moḓoro. Zwa zwino ri humbela u ṋeiwa tshikhala ri roṱhe, fhedzi vhane vha takalela u isa ndiliso dzavho vha fanela uya kerekeni hune ha vha na thabelo. Hu ḓo ḓivhadzwa nga ha mbulungo ya mubishopho musi zwidodombedzwa zwo no bviselwa khagala nga vhunzhi," vha amba.
Munwe wa vhahulwane vhe vha isa ndiliso dzavho ndi Neḓorobo vha Thulamela, Vho Sarah Rammbuda. "Nga u imelela vhathu vha vhupo ha Masipala wa Thulamela, ndiri Dokotela Vho VW Madzinge na vha muṱa nga vha ṱanganedze ndiliso idzo dzi vha kuvhatedze kha tshifhinga itshi tshi konḓaho," vha amba.
Mudzulatshidulo wa foramu ya vhafunzi vha Vhembe, Dokotela Vho Alunamutwe Randitsheni, vho nea maipfhi avho a ndiliso kha vha muṱa. Vho ṱahisa lufu lwa Vho Madzinge sa u xelelwa kha vhakhriste vhoṱhe nga u angaredza.
Mubishopho vhovha vhe ṅwana wa mutumbuli wa tshivhidzo tsha CWC Dokotela Vho William Madzinge. Vhathu vha ḓo dzulela u vha elelwa nga mishumo ye vha shela khayo mulenzhe kha u ṱuṱuwedza vhaswa vha Vhembe na vhana vha vhafunzi kha u tshila matshilo ane a ḓovha tsumbo kha vhanzhi.