Tshiṱori nga: Victor Mukwevho. Ṱhalutshedzo nga: Khathutshelo Raliphaswa.
Mulwela sialala Vho Pfariso Negondeni vha bvaho Tshilamba vha khou dovha hafhu vha lila nga u ṱahelelwa nga thikhedzo ya masheleni, vhari ṱhahelelo iyo ndi yone ine ya shela mulenzhe zwihulu kha uri vhathu vha sendele kule na mishumo ya sialala.
Kha nyambedzano navho nga ḓuvha ḽa u pembela vhufa nga Mugivhela wa ḽa Fumbili-raru Khubvumedzi, kha vhuṱambo he ha farelwa mudavhini tsini na mudi wavho ngei Lukau Tshishivhe, vhori, "Vhathu a vha tsha ḓi ṋea tshifhinga tsha u guda nga ha siala na vhubvo havho sa kale. Izwi zwi itwa nga u ṱahelelwa masheleni a u alusa mishumo ya sialala. Vhabebi a vha tsha gudisa vhana vhavho nga ha vhufa ngauri zwi vho ḓura u fara vhuṱambo nga hazwo. Vhana vha musalauno a vha tsha gudiswa kana u amba nga nyambo dza damuni nga nḓila yone zwikoloni, vha vho ambesa luambo lwa Luisimane zwine zwa shela mulenzhe kha u furalela sialala na vhubvo havho. Naa ro no hangwa vhune hashu?" vha vhudzisa.
Vho Negondeni, mme a vhana vhavhili, vho thoma tshigwada tshavho tshine tsha ḓi sendeka kha sialala tshigwada tshine tsha vhidzwa Pfarelo Cultural Group minwaha miṋa yo fhiraho vhe na ndivho ya u gudisa vhaswa nga ha sialala. "Ndi na vhana vha fhiraho vha fumalo vhane vha ḓa vha tshi guda mitshino ya sialala muḓini wanga. Ndi fanela u vha lugisela zwiambaro zwa sialala zwa vhasidzana na vhugoni ha vhaṱhannga, hone izwo zwoṱhe zwia ḓura." vha amba.
Vha sumbedzisa uri muvhuso na vhoramabindu vhapo a vha thusi zwiimiswa zwine zwa khou tou thoma zwa nga ha sialala. "Vha tikedza vhaḓivhalea, vha tshi itela u vhoniwa. Vha ḓivha uri arali vha tikedza vhaḓivhalea na vhorapolotiki, vha nyanḓadza mafhungo vha ḓo anḓadza zwine vha ita. Fhedzi arali vha tikedza rine vha shayaho, ahuna kule hune zwa ḓo ya hone. Ri khou balelwa kha masia oṱhe," vha engedza.
Vho Negondeni vhari vho no lingedza u humbela u lambedzwa, fhedzi ahuna thuso ine vha i wana. "Arali nda balelwa nga ndambedzo ndi ḓo fanela u vala tshiimiswa tshanga sa izwi ndi tshi balelwa na u unḓa muṱa wanga," vha amba nga mbilu vhutungu.