Ṱhatshedzo nga Khathutshelo Raliphaswa.
Mulidzi wa kaṱara makone ane a dovha hafhu avha ramuzika wa nyimbo dza sialala ya Tshivenda Thiathu Neshikweta, a bvaho Hamakhuvha tsini nyana na Matatshe, ndi muna are na mbilaelo. Mbilaelo yawe ndi ine ya yelana nauri tshipiḓa tsha vhutshilo hawe tsho tshinyadzwa kha zwine a tenda uri ndi zwe zwa ḓa u mulinga lutendo kha zwa nḓowetshumo ya muzika.
Kaṱara ḽa Netshikweta ḽine a funa u ḽi vhidza Ninja ḽo tshinyadzwa kha khombo ye ya itea mafhelo a vhege mbili dzo fhiraho. Nga hone u kundelwa u tshila asina kaṱara yawe, Netshikweta u khou humbela muthu wa mbilu ya vhuthu uri a mu thuse nga kaṱara ntswa, uri a kone u bvela phanḓa na u takula sialala na mvelele nga kha muzika.
"Hovha hu na mutambo wa bola kha muvhundu wa tsini, he sa nga misi, ndo ḓi ya hone u ṱalela mutambo na vhaṅwe nda ḓi tamba kaṱara yanga ndi tshi mbvumbvusa vhathu, vhe vha takalela muzika wanga," a amba. "Nga ḓuvha iḽo, ndo tamba na luimbo lwanga luswa lwe nda lu sika hanefho mutamboni, hone vhathu vha ḓou ḓala nga dakalo nga luimbo lwanga. Ndo tamba kaṱara unga ahuna matshelo nga hetsho tshifhinga, ndi sa zwiḓivhi uri ndi khou laelana na katara yanga ine nda i funesa," a engedza.
Nga murahu ha mutambo, Netshikweta o ḓou bvela phanḓa nau lidza kaṱara yawe, he tshigwada tsha vhathu vhe vhanzhi vha vha vha khou ḓiphina nga muzika wawe afho luvhanḓeni. "Hovha ho no swika luswiswi musi ndi tshi ṱoḓa u ṱuwa, he muṅwe wa vhataleli, e avha e na goloi ya baki, o ḓou ḓi pima uri u ḓo nngisa hayani na vhaṅwe vhaṱaleli. Rovha ri khou ya hayani ndo dzula nga murahu kha goloi iyo, he mureili a ḓou lingedza u shavha iṅwe goloi ye yavha yo ima phanḓa hashu. Ndo ḓou kundelwa u langa kaṱara yanga musi goloi iyo i tshi ima nga tshihaḓu, katara ya ḓou wela vhukati ha bada. Zwe nda vhona musi ndi tshi lavhelesa he kaṱara ya wela hone ndo mbo khaula mbilu yanga ndi tshi tou vhona kaṱara yanga yo tshinydzwa lu bilufhadzaho,"
Musi a tshi vhudziswa uri ndi ngani a tshi vhidza kaṱara yawe uri Ninja, o ḓou amba zwauri: "Ndi vhambedza kaṱara yanga na mutambi wa zwa dzi karati sa izwi i tshi ntendela uri ndi mbeledzele vhathu madembe luvhanḓeni nga miṅwe yanga. Ninja hovha hu yone ṱhama yanga khulwane hone zwo leluwa u ṱuwa nayo huṅwe na huṅwe."
Netshikweta o amba zwauri o vhulunga masheleni lwa minwaha iswikaho mivhili uri a renge Ninja minwaha ya fumi yo fhiraho. "Zwa zwino musi vhathu vha tshi renga muzika kha zwileludzi zwa vhudavhidzani hone nau bukiwa zwi tshi konda, zwi ḓo ndzhiela tshifhinga tshilapfu uri ndi kone u vhulunga masheleni au renga kaṱara," a amba.
Vhane vha takalela u thusa Netshikweta vha nga founela Netshikweta kha nomboro dza 076 230 7552.