Tshiṱori nga: Thembi Siaga. Ṱhalutshedzo nga: Khathusthelo Raliphaswa.
Mutambi wa matambwa Anthony Makatu, we a vhuya a shuma sa ramafhungo, a dovha a shela mulenzhe kha matambwa a Thelevishini a fanaho na Muvhango (SABC 2), The Estate (SABC3) na Giyani: Land of Blood (SABC 2), zwi sumba ana vhumatshelo havhuḓi kha nḓowetshumo ya vhumvumvusi. Kha iyi nḓowetshumo, u ḓivhiwa nga la Tony Mactony.
O tamba kha litambwa ḽine ḽapfi The Black Door, ḽe ḽa thoma u sumbedzwa kha etv nga ḽa fumithihi ḽa Lambamai ṅwaha wo fhelaho. Afho o tamba sa muḓinda wa khothe ane a sa tende u ḓi dzhenisa kha mafhungo a tshanḓa nguvhoni musi e mushumoni wawe. Uri nga murahu ha musi o dzhenela ndingo dza u ṱoḓa u wana tshipiḓa tsha u tamba kha litambwa ḽa The Black Door, o mbo ḓi tholwa ho tou fhela ḓuvha lithihi fhedzi. Makatu uri izwo khae zwi amba mathomo a vhumatshelo havhuḓi vhutshiloni hawe.
Naho mathomoni ovha a tshi tevhela sia ḽa Engineering, lutamo lwawe lwa nḓowetshumo ya vhumvumvusi lwo bva phanḓa. O ḓo gudela u bveledzisa matambwa a Thelevishini fhaḽa VMCIT na Media Industry nga ṅwaha wa gidi mbili fumbili-thihi.
Kha nyambedzano ye a i fara nga luṱingo na vha gurannḓa ya Mirror, Makatu o amba nga ha vhumatshelo hawe siani ḽa Thelevishini. Ene uri: "Ndi pfa ndo fhaṱutshedziwa nga maanḓa nga nḓila ine zwithu zwa khou mpenyela ngayo. Zwovha zwi songo leluwa. Zwi a konḓa arali ni songo farana na vhatambi vhono bvelelaho kha heyi nḓowetshumo,".
Makatu uri o sumbedziwa kubuli kwa u serela ngakwo kha nḓowetshumo ya matambwa nga munna wa vhane vho Vuledzani Munyai, vhe vha vha vhe mune wa Vule Media Industry.
Uri o thoma u tamba kha litambwa ḽi nopfi "The evil of man" ḽe ḽa bveledziwa nga Vho Munyai nga nwaha wa gidi mbili fumimalo. Iḽo litambwa ḽo sumbedzwa kha Mzansi Bioskop na Mzansi Magic.
Makatu o tamba na kha litambwa ḽa Mzansi Magic, ḽine ḽapfi Shaka ilembe, he a tamba na vhatambi vha ḓivheaho sa Nomzamo Mbatha.