Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Nḓowetshumo ya muzika wa gospel shango ḽoṱhe, nahone zwihuluhulu fhano kha tshitiriki tsha vhembe, i kha ḓi tetemela na pfa vhuṱungu nga u fhira fhano shangoni ha iṅwe ya ṋaledzi dzayo dzavhuḓisa, Palesa Madembe Ravele.
Ndi khwine u ḓivhiwa sa DeReal Palesa kha vhatevheli vha muzika, muimbi wa miṅwaha ya 31 u bva vhuponi ha Itsani Tshisahulu o lovha nga Swondaha, ḽa 7 Khubvumedzi, nga murahu ha u lwa na vhulwadze vhu songo bulwaho he ha a lwa naho lwa tshifhinga tshilapfu a tshi dzhena na u bva vhuongeloni lwa tshifhinga tshilapfu.
Mafhungo a lufu lwawe o thoma u phaḓalala nga Musumbuluwo nga maḓautsha, nga ḽa 8 Khubvumedzi, nahone nga u ṱavhanya nyanḓadzamafhungo ya matshilisano yo vha i tshi khou ṱoḓa u hulisa u bva kha kotara dzo fhamba-fhambanaho, u katela na kereke dze a vha a tshi dzi shumela nga muzika wawe.
Khaladzi a ṋaledzi ya evangeli, Anza Ravele, o ṱalusa u fhira hawe sa tshiṱhavhi tshi tshinyadzaho kha muṱa. "Khaladzi anga o vha e tshithu tshiṅwe na tshiṅwe kha riṋe. O vha e wa u fhedzisela fhedzi o vha e na vhuthihi muṱa woṱhe. O vha a tshi dzhena na u bva vhuongeloni, fhedzi ro vha ro fulufhela uri u ḓo fhola a vhuya hayani. Ri ḓo mu elelwa misi yoṱhe," o ralo.
Mme awe, Vho Meriam Tshikosi vhe vha vha vha tshi dzula nae, vha ri lufu lwawe lwo sia tshikhala mbiluni yavho. "O vha e thikho yanga ya maanḓa, nahone ndo vha ndi tshi kha ḓi lavhelela zwinzhi khae. O vha e mudzia-mulalo, tshifhinga tshoṱhe a tshi khwaṱhisedza uri dzikhuḓano dzo tandululwa nga nḓila ya vhukonani nahone vhushaka ho vhuyedzedzwa. O vha a tshi dzhiela nṱha vhuthihi na vhuthihi," vha ralo.
Khonani ya Palesa ya tsini, Adv Rinae Tshikovha, o talutshedza Palesa sa muthu ane a ovha a tshi funesa nyaluwo ya muthu munwe na munwe nga eṱhe na u ḓi bveledza. "O vha e ramabindu wa u ṱhogomela. O vha a sa hwali vhuṱungu, a tshi funa mulalo, nahone a tshi dzhiela nṱha u pfumedzana. O swikelela zwinzhi vhukuma kha muzika, nahone a thi na ḽiṅwe ipfi ḽine ḽa mu ṱalusa khwine u fhira ngano. O kwama matshilo a vhathu vhanzhi vhukuma, nahone lufu lwawe ndi u xelelwa vhuhulwane kha riṋe roṱhe," o ralo.
Lwendo lwa muzika wa Palesa lwo thoma musi lu tshee muṱuku vhukuma. Nga murahu ha u ita maṱiriki, o tevhela lutamo lwawe lwa muzika nahone a dovha a ḓidzhenisa kha zwa mabindu nga u thoma tshumelo ya thekhisi, ye ene muṋe a i shumisa, a tshi hwala vhana vha tshikolo.
Ovha muthu e a bveledzwa nga Rofhiwa Gospel Star Talent Search nahone o imba khathihi na vhaimbi vhanzhi vha nṱha vhapo na kha lushaka.
U do humbulwa nga dzi nyimbo dza maanda dzi ngaho Murena ipfha Thabelo Yanga, Vhuhulu Hawe, Ndi Yehova o ri lwelaho na Ndi Yesu Fhedzi.
Palesa o vhulungwa nga Mugivhela, ḽa 13 Khubvumedzi, ngei Itsani kha mbulungo ye ya kokodza vhueni vhunzhi u nga vhafunzi vhanzhi na vhaimbi vha bvaho kha shango ḽoṱhe vhane vhanzhi vho shuma nae kha muzika wa Gospel.