Tshiṱori nga: Maanda Bele. Ṱhalutshedzo nga: Khathutshelo Raliphaswa.
Ntikelo Diligent Rikhotso a bvaho kha kusi kwa Saselamani khavhupo ha Malamulele u khou alusa dzina ḽawe sa mubveledzi wa zwiambaro. Ntikelo wa minwaha ya fumbiliraru, o tou ḓi gudisa u runga hone o novha na bindu ḽawe ḽa Valore Diligent ḽe ḽavha ḽo topolwa u imedzana na vhanwe vho ramabindu vhapo kha sia ḽa zwiambaro. Ṱano iḽo ḽo farelwa hodelani ya Porche Villa ngei Tswinga nga ḽa fumi malo Luhuhi ṅwaha uno, ye ya swielelwa ngavha First Style Designs wo rangwa phanḓa nga Jane International Luxena Sandra Nngwedzeni Ndou.
Ntikelo uri u runga hawe ho ṱuṱuwedzwa ngau takalela hawe zwa fesheni he a renga mutshini wawe wau runga nga ṅwaha wa gidimbili fumbili nga tshifhinga tsha musi shango ḽo valwa. Nga khau ṱalela hawe dzi vidio dzau guda u runga kha masiatari o fhambanaho kha YouTube zwo mu thusa kha u ḓi gudisa u runga.
"Ndi tshi renga mutshini wanga wau thoma, ndovha ndi sina muhumbulo wau thoma bindu ḽau bveledza zwiambaro fhedzi ndo no thoma bindu ḽa zwiambaro. Ndovha wa mashudu u ḓi wana ndi na bindu nga hone uḓi gudisa zwau runga hu sina o ngudisaho. Ndia wana thikhedzo kha vha muṱa wa hashu, hone vho ntikedza ubva mathomoni azwo.
Ahuna we a nnyamisa musi ndi tshi renga mutshini wanga wau thoma. Vha muta wa hashu vha aḓi ṱongisa nga zwiambaro zwine zwavha zwo rungiwa nga nne. Ndi fulufhela uri tshifhinga tshe nda di nea tshone ndi tshi khou ḓi gudisa u runga, uvha na nungo dzau ḓi khakhulula he nda khakha hone na tshilidzi tsha mudzimu zwo nthusa ndi tshi dzhena kha ndowetshumo ya zwiambaro. Ṱano ḽe ḽa itwa nga Luhuhi ḽovha ḽihulwane kha nne. Kha zwoṱhe, ndi livhuwa uri vhathu vho kona u vhona mushumo wanga nau takalela zwiambaro zwine nda bveledza ndi ngazwo ndi tshi shuma ndo ḓi imisela kha mushumo wanga," a amba.
Ntikelo u ṱuṱuwedzwa nga khotsi awe vhane vhavha mutsila. "Ndo aluwa ndi tshi vhona vhutsila kha khotsi anga vha vhu bveledza nga zwanḓa zwavho. Khotsi anga vha funa vhutsila lune naho vho fhungudzwa mulenzhe, vha khaḓi bvela phanḓa na vhutsila havho. Ndi ṱuṱuwedzea nga mishumo yavho uri na nne ndi swikelele hune vhavha hone. Naho ndi tshi ṱangana na dzi khaedu, athi tendeli zwikhukhulisi zwi tshi nthivhela u bveledza ndivho dzanga," a amba.