Tshiṱori nga Thembi Siaga. Ṱhalutshedzo nga Khathutshelo Raliphaswa.
Murendi wa Xitsonga na muṅwali wa mafhungo Hlaya Antonette Shiburi, ane a ḓivhivhea khwine sa N'wa Jika The Poet wa Phitbye Ra Afrika, o huliswa nga pfufho yawe ya vhufumi na iṋa kha Pfufho dza Honoree dza Afrika dzo farelwaho Sandton Laiburari nga ḽa 31 Fulwana.
Mutsila wa minwaha ya 35 ane a bva kha muvhundu wa Madobi o vha a tshi dzhielwa nṱha nga u shela mulenzhe hawe hu bvelaho phanḓa kha maṅwalwa a Afrika, mvelele na u anetshela zwiṱori zwa mvelele a tshi shumisa luambo lwa ḓamuni.
U ḓivhelwa vhurendi hawe ha maanḓa na ha maḓipfele a Xitsonga, Shiburi u shumisa ipfi ḽawe u takusa, u fhola na u ṱumana na vhathetshelesi kha mirafho yoṱhe. Nga murahu ha minwaha, o no vha muthu ane a ṱhonifhiwa kha mvelele ya Limpopo ngau angaredza. U dovha a vha murendi wa thendo, muṅwali, mutambi wa matambwa, muambi wa ṱhuṱhuwedzo, MC, mutsila wa ipfi na mufhaṱi wa tshitshavha. Nga nnḓa ha vhutsila, ndi muḓivhi wa muḓagasi o zwi gudelaho.
"U wana pfufho yanga ya vhu 14 sa muṅwali na murendi ndi zwithu zwine nda zwi dzhiela nṱha nga maanḓa. Pfufho iṅwe na iṅwe i hwala nganea yo khetheaho, nahone heyi i nkhumbudza uri ipfi ḽiṅwe na ḽiṅwe ḽe nda ḽi ṅwala a ḽo ngo vha mahandana fhedzi zwo mmbuyedza vhukuma," vho ralo.
O livhuwa u wana hawe pfufho kha muṅwe na muṅwe we a tikedza lwendo lwawe. "Ndi zwa muthu muṅwe na muṅwe we a vha a tshi tenda kha mishumo yanga, vhathetshelesi vhoṱhe vhe vha thetshelesa, na murendi muṅwe na muṅwe muswa ane a vhona muloro wawe kha lwendo lwanga."
Nga 2022, o thoma Switirhela Ku Lulama, mvelele ya zwiambaro, nahone o thoma N'wa Jika The Poet NPC u itela u isa phanḓa mushumo wawe wa u ṋea maanḓa na u vhulunga mvelele. "Musi ndi tshi sedza murahu, lwendo lwanga lwo thoma nga lutamo lwo leluwaho lwa u ḓiṱahisa na u ṱangana. A tho ngo vhuya nda humbula uri vhurendi hanga vhu ḓo kwama matshilo nga nnḓa ha muḓi wanga," o ralo.
O dovha a livhuwa Anthea Thyssen Ambursley, mudzudzanyi wa Pfufho dza Honoree dza Afrika, kha u sika pulatifomo ine ya pembelela vhasiki vha Afrika. "Kha muthu muṅwe na muṅwe ane a khou tshimbila lwendo lwawe: bvelani phanḓa. Mafhungo aṋu a a vhalea," o ralo.