Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Nzumbululo Todani (18) u bva tshikoloni tsha nṱha tsha Mbilwi tshine tsha wanala Sibasa ovha ene mugudiswa wa nṱhesa fhano vunduni ḽa Limpopo. Nḓivhadzo iyi yo itwa nga MEC wa muhasho wa pfunzo Vho Mavhungu Lerule Ramakhanya nga tshifhinga tsha vhuṱambo hodelani ya The Ranch nnḓa ha Polokwane nga ḽa 14 Phando.
Todani o swikelela naledzi dza sumbe, kha thero dza mbalo, physical science, life sciences, Geography, Tshivenḓa, Life orientation, na Luisimane luambo lwa u thoma lwa u engedza.
Musi a tshi vhudziswa nga ha tshiphiri tsha u shuma hawe zwavhuḓi, Todani o amba uri u bvelela hawe ho vhangwa nga u langa tshifhinga, u ḓilaya, na u shuma nga maanḓa oḓi vhudza. O dovha a khoḓa tshilidzi tsha Mudzimu kha zwe a zwi swikelela.
O sumbedza u livhuwa thikhedzo ye a i wana kha vhadededzi vhawe na vhabebi vhawe, o amba zwauri yo vha na mushumo wa ndeme kha u bvelela hawe. O ri: "Zwo vha zwi songo leluwa, nahone ndi tama u dzhia tshenetshi tshifhinga u livhuha vhabebi vhanga, vhadededzi, miraḓo ya tshigwada tshi langaho tshikolo, na muṅwe na muṅwe we a ntikedza kha pfunzo dzanga, " a amba.
Todani o eletshedza vhaṅwe vhagudi uri vha wane vhathu vho bvelelaho sa tsumbo dzavho. O ṱalutshedza a ri: "U vha na vhathu vhane vha nga vha edzisa vhutshiloni kanzhi zwi thusa muthu uri a vhe na tshifanyiso tsha hune a ṱoḓa u vha hone tshifhingani tshi ḓaho, "a engedza.
Todani u khou pulana u guda zwa mechatronics kha Yunivesithi ya Kapa uno nwaha.
Mme awe vhane vha ḓikukumusa, Vho Avhasei Nndwamato, vho ṱalusa mutukana wavho sa muthu ane a funesa bugu. "Ndi muraḓo wa u thoma wa muṱa washu u swikelela zwenezwi, nahone ri a ḓihudza ngae vhukuma. Ndi a zwi ḓivha uri o ṱalifha, fhedzi u kha ḓi shuma nga maanḓa, nahone o ḓikumedzela vhukuma. O vha a tshi fhedza tshifhinga tshinzhi a tshi khou ita mushumo wa tshikolo nahone a tshi dovha a thusa vhaṅwe vhagudiswa kha ngudo dzavho," vha amba.
Todani o dovha a vha na maipfi a u khuthadza vhagudiswa vha sa bveleli. O vha ṱuṱuwedza uri vha shume nga maanḓa nahone vha songo laṱela thaula. "Vha fanela u fhungudza u ya dziphathini. U ṱalela TV a zwi thusi, nga maanḓa musi zwi sa funzi," ho amba Todani ane a amba nga nḓila ya vhulenda.