Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Kgawelo Rabambukwa u bva Niani Tshipise wa minwaha ya fumi sumbe, o sia vhaṱaleli kha muṱaṱisano wa zwirendo wa Limpopo Poetry Slam vha tshe na ḓora ḽa upfa zwirendo zwawe. Kgawelo o dzhia vhuimo ha u thoma kha tshitenwa tsha vhurendi ha maipfi a luisimane. Tshirendo tshawe tsho tswa mbilu dza vhaṱaleli nga nḓila ye a renda ngayo.
Muṱaṱisano uyu wo farelwa Ha-Njhakanjhaka holoni ya tshitshavha ngei kusini kwa Ha-Bungeni nga Mugivhela wa ḽa fumi ṱhanu Fulwane, he havha na vhaṱaleli vha fhiraho maḓana mavhili. Mufhenyi wa muṱaṱisano hovha Hlayisani Shiburi u bva kusini kwa Ha-Madobo ane a ḓivhea khwine nga ḽa N'wa Jika The Poet Phyembye Ra Afrika. Hone kha vhaeni vha muṱaṱisano uyu hovha na vhahulisei vha fanaho na khosi Given Bungeni na vhanwe vhanzhi. Hovha na u mvumvuswa nga vhoramuzika vha fanaho na Themba Nyathi, Dj Mfundisi, na Maponyani, u tou bula vhaṱuku kha vhanzhi.
Vho-Shiburi vhari muṱaṱisano uyu asi wa u pembela nyambo dzo fhambanaho fhedzi, fhedzi u dovha wavha wa u ṱuṱuwedza vhaswa na vhaṱuku uri vha takalele vhutsila ha vhurendi. Muṱaṱisano uyu wovha wo khethekanywa nga kha zwitenwa zwivhili, tshitenwa tsha vhurendi ha khuliso na tshitenwa tsha vhurendi ha maipfi. Zwirendo izwo zwo rendwa nga nyambo nṋa, Tshivenda, Xitsonga, Sepedi na Luisimane.
Vhurendi ha Kgawelo ho sumbedzisa uvha ho fhambanaho na ha vhanwe vharendi vha fumithihi, zwe zwa sia vhaṱaleli vha tshi ḓi vhudzisa uri na uyu ndi murendi makone naa?, nga vhurendi uho, o wana gundo kha muṱaṱisano uyu. O dzhia vhuimo hau thoma kha vhurendi ha maipfi, a tevhelwa nga Roberta Shikwambana a bvaho Elim. Kgawelo oavhelwa tshiphuga tsha musuku, ṱhanziela, na masheleni a swikaho zwigidi zwivhili zwa dzi rannda. "Yovha khuliso khulwane kha nṋe uukunda kha muṱaṱisano uyu, lune ndi fulufhela uri ndi ḓo swikelela zwivhuya zwinzhi, u fana na N'wa Jika na VendaBoy Poet, sa izwi vhe vhone vharendi vhane vha nṱuṱuwedza," a amba.
Kha tshitenwa tsha vhurendi ha khuliso ha Xitsonga, o dzhiaho vhuimo ha u thoma ndi Zanele Zitha, a tevhelwa nga Lulama Mabunda kha vhuimo ha vhuvhili, vhoṱhe avha vha bva Giyani. Kha tshitenwa tsha vhurendi ha Sepedi, Tshabopja Moshoma a bvaho Sepukubje o dzhia vhuimo ha u thoma, ngeno Maria Madihlabo wa Bulugwane o ima kha vhuimo ha vhuvhili. Vhuimo ha u thoma kha tshitenwa tsha vhurendi ha khuliso ha Tshivenda, ho wanwa nga Edwin Nesthidzati wa kusi kwa Mpheni, a tevhelwa nga Tsireledzo Malitsha wa Ha-Masakona kha vhuimo ha vhuvhili.
Vharendi avha vho ṱuwa hayani na pfufho dza zwiphuga, mendele, ṱhanziela, masheleni a gemo a u fhambana, na dzi mpho.