Tshiṱori nga Kaizer Nengovhela. Ṱhalutshedzo nga Khathutshelo Raliphaswa
Nga murahu ha minwaha ya u shuma kha nḓowetshumo ya muzika vha sa dzhielwi nṱha, Vho Trica Selala-Miriri vha bvaho Nzhelele Hafunyufunyu vho fhedza vho tshenzhela ṅwaha wa u kunda kha pfufho. Muimbi wa muzika wa gospel vho pfufhiwa nga kha aḽibamu ya Gospel ya Nṱhesa ya Lushaka kha Pfufho dza Gospel dza Mpumalanga dze dza farelwa ngei Mbombela nga Swondaha, ḽa 8 Nyendavhusiku.
Heyi ndi pfufho ya vhuvhili ya Selala uno nwaha. Nga ṅwedzi wa Khubvumedzi, vho dovha vha pfufhiwa ngakha aḽibamu ya Evangeli ya Mvelele ya Nṱhesa kha Pfufho dza Ingoma Music Awards, dze dza farelwa Meropa Casino. Pfufho iyi yo ḓa sa tshimangadzo kha ramuzika.
"Ndo vha ndi tshi humbula uri ndi khou sokou engedza nomboro, ndi si na fulufhelo ḽa u pfufhiwa. Ndo vha ndi sa kholwi nḓevhe dzanga musi dzina ḽanga ḽi tshi vhidzwa luvhanḓeni. Ndo humbula unga ndi khou lora nda ṱoḓa u lila ngau ḓalelwa nga dakalo. Ndi zwavhuḓi u ḓivhiwa nga yeneyi nḓila. Nḓowetshumo i kha vhuimo ha fhasi ha tshifhinga tshoṱhe, fhedzi u rwa muṱana zwi ṋea muthu tshivhindi na fulufhelo ḽauri zwihulu zwi kha ḓiḓa," vha amba.
Vho engedza nga uri: "Ndi na lutamo lwa u wana pfufho nnzhi." "Thikhedzo ine nda khou i wana i a mangadza, nahone vhathu vha khou voutha nga vhunzhi . U wana dzinwe pfufho zwi ḓo vha zwihulwane kha nne, fhedzi vhugala hoṱhe ndi ha Murena, we a nṋea tshifhiwa tsha vhurabeli. Ndo vha ndo ḓi vhudza uri ndi ḓo dzhia maga maṱuku kha lwendo lwanga nda vhona uri ndi nga swika ngafhi, fhedzi vhukuma Mudzimu o vha e na pulane khulwane kha nṋe. Nḓila ye vhathu vha ṱanganedza ngayo Mahlololo zwovha zwi tshi takadza vhukuma, nahone a thi dzhii lufuno lwa vhathu sa tshithu tshi sa ṱoḓei. Ndi livhuwa Murena nge vha nṋea vhuḓinḓa ha vhurabeli," vha amba.
Naho lwendo lwavho lwa muzika lu songo tshimbila zwavhuḓi, Selala vho amba uri thikhedzo ye vha i wana kha vhafuni vhavho yo ita uri vha bvele phanḓa. Vho ri: "Ndi ḓovha ndi songo ita zwo fhelelaho arali nda hangwa u livhuha muṅwe na muṅwe we a ima murahu hanga."