Tshiṱori nga Vho-Kaizer Nengovhela. Ṱhalutshedzo nga: Khathutshelo Raliphaswa.
Vhadzulapo vha Waterval tsini na Elim vhari vha na minwaha ya malo vha na thaidzo ya dzi phaiphi dzau tshimbidza malaṱwa dzine dza khou vha ḓisela lwefha lusi lwavhuḓi.
Vho-Marubini Senoamadi, vhane vha vha mudzulapo wa afho, vhari vhaa vhialela nga mutakalo wa vhadzulapo nga nyimele iyi hone ,vha masipala vha fanela uzwi lugisa. Vhari phaiphi idzi dzi vha kungela zwikhokhonono na vhunyunyu, zwine zwa sia vhadzulapo vha tshi u tshila zwavhuḓi, izwi zwi nana musi mvula i tshi na. Vhana vha balelwa u tamba dzi badani sa izwi zwiendedzi zwi tshi vha hasha na maḓi aya a lwefha lusi lwavhuḓi, zwine zwa vha kombetshedza u tambela hayani fhedzi.
Naho vhadzulapo vho isa mivhugo kha vha masipala u bva ṅwaha wa gidimbili fumi ṱhanu, ahuna tshanduko kana thuso ine ya ḓiswa kha nyimele iyi. Vho isa khumbelo kha mukhantshelara wa vhupo uho, fhedzi u swika zwino, ahuna tshanduko. Vho-Senoamadi vhari hu fanela uḓa thuso ya tshihaḓu sa izwi hu nyimele iyi isa ṱanganedziwa u tshila nayo lwa tshifhinga tshilapfu hone vhadzulapo vha balelwa u ita vhunzhi ha mishumo yavho mahayani.
Munwe wa vhadzulapo, Vho-Mable Maluleke, vhari avha farei zwavhuḓi nga phindulo ya vha masipala kha nyimele iyi. Naho vha tshi ḓi ḓa vha lingedza amba nga ha nyimele yashu, thaidzo yashu ai tandululwi. "Vhadzulapo vha balelwa u tshila zwavhuḓi na miṱa yavho, lwefha lune lwa ḓiswa nga phaiphi idzi lu vhavha kombetshedza u dzula vho vala mavothi na mafasiṱere sa izwi lwefha ulwu lu sa konḓelelei. Na mashaka a vha tsha ri dalela sa zwi vha tshi ofha u kavhiwa nga malwadze nau shavha munukho wa dzi phaiphi idzi," vha amba.
Muambeli wa Masiapala wa tshiṱiriki tsha Vhembe, Vho-Matodzi Ralushai, vha tshi ṋea phindulo ya kha nyimele iyi, vhari vha muhasho wa thekiniki vha ḓo amba navho nga ha nyimele iyi, fhedzi ahuna tshifhinga tsho vhewaho uri zwi ḓo itea lini hone na uri vha ḓo ita mini a zwingo bulwa.