Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Vhabebi na miraḓo ya khoro mbusi ya tshikolo tsha nṱha tsha HS Phillips tshire kusini kwa Shirley tsini na Elim, vho sumbedzisa dzi mbilaelo dzavho nga hau tshinyala ha phera dzau gudela tshikoloni itsho. Tshikolo itshi tsha tsho fhaṱwa nga ṅwaha wa ḓaṱahe furaru-mbili, hone zwa zwino phera nnzhi dzo no tshinyadzea, ṱhanga dzo fuḓuluwa nga muya nga ṅwaha wa gidimbili fumbilithihi. Muya uyo wo tshinyadza na zwishumiswa zwa tshikolo na vhagudi.
Vha khorombusi ya tshikolo vho isa mivhigo kha muhasho wa pfunzo, he vha ṋewa phera dza tshifhinga nyana dzau gudela, vha fulufhedziswa uri vha ḓo fhaṱelwa phera dzau gudela nga ṅwaha wa gidimbili fumbilimbili. Naho vha khoro mbusi na tshikolo vho dzulela u sala murahu u fhaṱwa ha dzi phera idzo, vha muhasho vho balelwa uvha nea tshumelo ye vha vha fulufhedzisa. Izwi zwo kombetshedza vhanwe vha vhagudiswa uri vha pfulutshele kha zwinwe zwikolo, hone na vha HS Phillips vha khou kundelwa u dzhia vhanwe vhagudi sa izwi tshiimo tsha phera dzavho tshi sa tendeli vhagudiswa vhanzhi.
Zwa zwino, tshikolo itshi tshi na vhagudiswa vha maḓana mavhili futhanu-malo u bva kha murole wa malo u swika kha wa vhu fumi mbili. Vhunzhi ha dzi phera idzi dzau gudela dzia bvuḓa misi ya mvula, hone vha balelwa na masheleni a muḓagasi.
Munwe wa vhabebi, Vho-Doris Mabasa, vhari vhaa vhilaela nga tsireledzo ya vhagudiswa. "Vha muhasho wa pfunzo vha fanela u ita zwe vha ri fulufhedzisa. Vhunzhi ha vhabebi muvhunduni uyu avha shumi, avha swikeleli u badelela vhana vhavho zwikolo zwa kule," vha amba.
Mugudiswa vha murole wa vhu fumi mbili, Marlyne Muvhali, uri sa vhagudi, vha ṱangana na dzi khaedu dza mutsho kha phera idzi dza tshifhinga nyana dze dza ḓiswa, hone na nḓisedzo ya muḓagasi ia konḓa nga tshifhinga tshine mvula ya na, zwine zwa vha konḓisela kha ngudo dzavho.
Mudzulatshidulo wa khoro mbusi, Vho-Vicky Muvhali, vhari vhunzhi ha vhagudisi na vhagudiswa vha khou pfulutshela kha zwikolo zwire na tshumelo dza khwine.
Vho-Mike Maringa, muambeli wa muhasho wa pfunzo Limpopo, vhari u ḓisa tshumelo ya khwine kha tshikolo tsha HS Phillips ndi innwe ya tshumelo dzine vha ḓo dzi shuma nga tshihaḓu. Vhari vha muhasho vho no isa masheleni au renga muḓagsi tshikoloni itshi.