Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Tshititshi tsha radio ya tshitshavha tshi vhidzwaho Radio Thohoyandou tsho phadaladza maphapha na tshumelo dzavho. Lwa awara nthihi ḓuvha ḽiṅwe na ḽiṅwe ḽa vhege, tshiṱitshi zwino tshi do hasha nga vhuḓalo kha GauTV, DStv Channel 265.
GauTV ndi ya muḓivhi wa zwa vhurereli a ḓivheaho, ramabindu na muimbi wa kale Vho Dokotela Tuwani Victor Phume.
U ya nga mulanguli wa tshiṱitshi, Vho Mpho Beatrix Makosholo - vhane vha ḓivhiwa khwine sa Zazi - nyambedzano dzo thoma tshifhingani tsho fhiraho. Dr Phume vho vha vha tshi dzulela u vha na bono la u tanganisa Radio Thohoyandou na GauTV.
"U bva tshe nda vha mulanguli wa tshiṱitshi, ndo vha ndi tshi khou shuma nga maanḓa nahone ndo mu thusa u ita uri bono ḽawe ḽi vhe ḽa vhukuma. Zwi pfala zwi zwavhuḓi u vha mulanguli wa tshiṱitshi wa u thoma u bvisa zwithu zwi ngaho hezwi. Sa mufumakadzi muswa kha nḓowetshumo ya nyanḓadzamafhungo, ndi muloro wo bvelelaho," vha amba.
Vho engedza nga uri u engedza u swikelela thendelano vhukati ha Radio Thohoyandou na DStv zwo vha zwi tshi khou bvelela vhukuma. "Zwi nga vha zwavhuḓi fhedzi. Mushumo wo khwaṱhaho u a badela vhukuma. Mudzimu u khou sumbedza tshilidzi tshawe nahone ndi khou tshila vhukuma muloro wanga, nahone zwinzhi zwi kha ḓiḓa kha heyi nḓowetshumo," o ralo.
Dr Phume, vhane na vhone vha vha na Zallywood, vha khou ṱuṱuwedza nga ha vhushaka. "Radio Thohoyandou 91.7 i ḓo hasha lwa awara nthihi kha GauTV u itela u sumbedza zwiṅwe zwa zwiitea na mbekanyamushumo dza vunḓu ḽa Limpopo. Sa vhulanguli ha GauTV ro dzhia vhukando ha u ṋetshedza zwishumiswa zwa khasho ya TV na u dovha hafhu u gudisa vhashumi vha Radio Thohoyandou kha u shumiswa ha thelevishini," vho ralo.
Tshiṱitshi tshi anḓadza nga maḓuvha a vhege u bva nga 19:00 u swika nga 20:00. Khasho dzo thoma nga ḽa 11 May.