Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Bulayo ḽa ramabindu a ḓivheaho wa Ṱhohoyanḓou Rudzani Victor Nemahagala, ane a ḓivhea nga ḽa Rasking, ḽo sia vhadzulapo vha vhupo ha Vhembe vhe na nyofho nga nḓila ye tshiwo itsho tsha bvelela ngayo. Nemahagala ovha e na minwaha ya fumbili-ṱahe a tshi thuntshwa a vhulawa nga vhathu vha sa ḓivhei zwa zwino e lwendoni lwawe lwa uya u ṱangana na munwe muthu Tshikhudini nnḓa ha Thohoyanḓou. Tshiwo itshi tsho bvelela nga madekwana a Lavhuṱanu nga awara ya vhuṱahe.
Uya nga muambeli wa mapholisa a Limpopo kholonele Vho-Malesela Ledwaba, Nemahagala ovha a khou reila kha gondo ḽa Punda Maria, o livha vhengeleni ḽau ḽela ḽa Dar es Salaam Tshikhudini, musi tshiwo itsho tshi tshi bvelela. "Hovha ho paka moḓoro wa Nissan NP 200 huna vhanna vhavhili muṅwe o ima nga nnḓa, ire na nomboro i songo ṅwaliswaho gondoni iḽo musi Nemahagala a tshi wela kha gondo pa giravhulo. Ho ḓou thoma u thuntshwa u bva kha moḓoro uyo vha tshi livhanisa na moḓoro wa Nemahagala, fhedzi o kona u reila u bva afho fhethu, he a ṱangana na mimoḓoro mivhili ye yavha yo paka tsini na gondo. Nissan NP 200 yo ḓou ṱuwa fhethu afho nga murahu. Vha tshumelo ya shishi vho khwaṱhisedza u lovha ha Nemahagala vha tshi swika afho. Nemahagala ovha o huvhala vhukuma nga dzi gulu," vha amba.
Nemahagala ovha a tshi ḓivhea sa ramabindu ane a ḓi ṱukufhadza, hone atshi ṱuṱuwedza vhathu. Ovha e na vhengele ḽa u rengisa zwiḽiwa nnḓa ha gudedzi ḽa Univen, butshara, na thavene ire Tshikweta nnḓa ha Ṱhohoyandou. Matshudeni a Univem, mashaka, vhashumisani, vhatevheli, na dzi ṱhama vho isa milaedza yavho ya ndiliso kha vha muṱa nga kha zwileludzi zwa vhudavhidzani.
Vho-Robart Nkhangweleni Nemahagala, khotsi a mufu, vhari u lovha ha ṅwana wavho zwo vhaisa vha muṱa vhukuma. "Ndo ṱanganedza luṱingo nga awara ya vhufumi mbili vhusiku ndi tshi ḓivhadzwa nga tshiwo, nda wana mapholisa vho no pfulusa tshitumbu u bva kha moḓoro wawe. Rudzani ovha e phedzi kha nṋe, e muthu ane a lwela u khwinifhadza matshilo a vhare tsini nae. O thusa vhathu vhanzhi hu tshi vhalwa na matshudeni. Sa muṱa, ri pfa ro xelelwa vhukuma sa izwi ovha e muthu ane ra ṱuṱuwedzea nga vhutshilo hawe. O sia vhana vhararu, mufumakadzi, vhashumeli vhawe, na mashaka vhe vha vha vha tshi lavhelesa khae," vha amba.
Vho-Nemahagala vhari vha tenda uri bulayo ḽa ṅwana wavho ḽovha ḽo tou reiwa, hone vhathu avho vhovha vho mu lindela a tshi swika. U tou sumbedza uri vhovha vha khou ṱoḓa u mu vhulaya fhedzi, ahuna thundu ye vha dzhia. "Ri fulufhela uri mapholisa a u sedzulusa vha ḓo fara vhapondi avha uri vha livhaniswe na tshanḓa tsha mulayo. Zwa zwino ri khou lugisela mbulungo yawe," vha engedza.
Vho-Ledwaba vho khwaṱhisedza uri ho vulwa mulandu wa bulayo, vha khou dovha hafhu vha zwimana na vhapondi. Ane avha na zwidodombedzwa zwine zwa nga thusa kha mulandu uyu vha nga kwama muofisiri Takalani Siaga, kha 082 469 2302, vha ngaya kha tshiṱitshi tsha tsini navho, vha founela nomboro ya lushaka ya 08600 10111, kana vha rumela mulaedza kha MySapsApp,
Mbulungo ya Nemahagala i ḓo farelwa Tshikhudini nga Mugivhela wa ḽa fumimbili Thangule.