Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
U fhambana na vhunzhi ha vhaimbi vhane nyendo dzavho dza thoma kerekeni kana kha dzikhwairi dza tshikolo, muimbi na muimbi wa nyimbo Ngwaniwapo Wazwothe Netshivhale o wana ipfi lawe o fhumula, nga ngomu ha ene mune. O vha a tshi zwi pfa - zwi bvuḓa, zwo nakaho - fhedzi lwa tshifhinga tshilapfu, o vha a si na tshivhindi tsha u tendela vhaṅwe na vhone vhukoni hawe.
Zwino a tshi khou imba nga fhasi ha dzina ḽa luvhanḓeni ḽa Taylor Gal, muimbi wa miṅwaha ya 25 a bvaho Dzwerani ngei Lwamondo o thoma lwendo lwawe lwa u sika dzinyimbo nga u ṅwala zwirendo.
"Ho vha hu ḽiṅwe ḓuvha ḽa khombo musi ndi na miṅwaha ya 10, nahone khotsi anga, Vho Thilifhedzi Ewerrt Netshivhale, vho nkhumbela uri ndi imbele tshiṅwe tsha zwirendo tshanga musi vha tshi khou tamba kaṱara yavho. Ndo imba tshenetsho tshirendo, nahone ipfi ḽeneḽo ḽo nakaho ḽo fheleledza ḽo bvelela, ndi tshi khou bvisa nyofho dzanga," a ralo.
U bva tsheetsho, o vha a tshi anzela u imba musi khotsi awe vha tshi khou mu lidzela kha kaṱara yavho.
Muzika wa Taylor wo simuwa nga ṅwaha wa 2022, musi a tshi ṱangana na mubveledzi De Nax nahone o vha a tshi sumbedzwa kha aḽibamu yawe ya "Ndi Funa Mapiano". O humbula a ri: "Ndo thoma u bveledza nyimbo ndi navho, nahone nyimbo idzo dzo ḓou thoma u lidzwa kha zwiṱitshini zwa radio dza tshitshavha."
U bvelela hawe ho ḓa mathomoni a 2025, musi a tshi ṱangana na DJ na mubveledzi Ramzin, we a bveledza nae nyimbo kha aḽibamu yawe ya Vharunwa kha luimbo lwa 'Khano Yanga'. U shumisana havho ho vhonala zwi khagala, nahone phindulo yo vha ṱuṱuwedza uri vha shumisane nga ho engedzeaho.
Zwa zwino vho bvisa luimbo luthihi lune lwa vhidzwa 'Lwendo' lune lwa khou wana thikhedzo yo khwaṱhaho na u dzhielwa nṱha hu khou aluwaho.
"Lwendo ndi lwendo," ho amba Taylor Gal. "Muṅwe na muṅwe washu ane a khou tshila, ane a khou fema u kha lwendo. Fhedzi ri ṱangana na zwithithisi, khaedu, na vhuleme nḓilani. Vhaṅwe vhashu vha na nḓala na u fa nga nḓala. Vhaṅwe vha na dzungu. Vhaṅwe vha na ḓora na u vha na vhuludu, vha tshimbila nga sogani ḽo omaho, vha tshi ḓipfa vhe vhoṱhe. A ri tsha ḓiphina nga mvula musi i tshi wa ngauri ro oma na u rothola. Ri khou tetemela na u sa vha na fulufhelo kha lwendo ulwu."
Ramzin o ṱalusa Lwendo sa tshiga tsha nndwa dza vhutshilo. "Vhathu vha kwamiwa nga miungo yashu ya muya - muzika wa muya na wa maḓipfele. Muṅwe na muṅwe u a funana na ṱhanganyelo yashu, nahone ri livhuwa vhukuma thikhedzo ye ra i wana u bva tshe ha bviswa Lwendo. Hezwi zwi tou vha mathomo; hu na muzika wo nakaho une wa ḓo ḓa. Dzulani no lindela," o ralo.