Tshiṱori nga Ngerezah Netshifhefhe. Ṱhalutshedzo nga Khathutshelo Raliphaswa.
Limpopo hu khou gonya ha Afro-pop na u pfa ha muya Ramzeey o bvisa lwa tshiofisi albamu(thadela) yawe ya muzika zwenezwino ya studio, Tongue Letter - khuvhanganyo i re na maanḓa i tshi khou ṱoḓisisa lufuno, vhuṋe, u elekanya na u aluwa.
Musi a tshi amba kha nyambedzano, Ramzeey o ṱalutshedza uri dzina ḽa albamu ḽi sumbedza nḓila ine a shumisa ngayo muzika na luambo u itela u fhirisela milaedza ya muthu nga eṱhe na ya matshilisano. "Ndi ḽeḓere ḽine ḽa ambiwa nga lulimi. Ndi shumisa muzika u itela u ṋekedza milaedza ya lufuno, vhutshilo na vhuthihi. I sumbedza vhudzivha ha zwine luambo lwa hwala zwone, na musi lu sa vhonali tshifhinga tshoṱhe," vho ralo.
Ṱhuṱhuwedzo ya alibamu yo ḓa musi mutsila a tshi khou sumbedza mvelelo dze muzika wawe wa vha nadzo kha zwitshavha zwoṱhe miṅwahani yo fhiraho. O ṱhogomela uri luambo lu vhumba u pfesesa na u fhodzwa. "Hu na vhuleme kha zwine ra zwi amba, naho ri sa zwi vhoni tshifhinga tshoṱhe. Ndi ngazwo ndo nanga dzina ḽa Luambo Lune Luṅwalo - lu fara milaedza ine ya fhodza na u ṋea maanḓa."
Musi a tshi khou vhulunga lutamo lwawe lwa vhutshilo hoṱhe lwa muzika, Ramzeey o sendela tsini na yeneyi albamu nga ndivho ntswa. "Muzika ndi tshipiḓa tsha vhutshilo hanga ha ḓuvha na ḓuvha, fhedzi nga hetshi tshifhinga ndo vha ndi tshi khou ṱoḓa u ḓivha nga ha zwine zwa khou itea tsini na riṋe nahone nda tendela muzika u tshi amba nga ha eneo mafhungo. Ndo vha ndi tshi ṱoḓa u a ṋekedza sa vhurifhi - mulaedza une nda nga u imba," o ralo.
O ṱalusa mubvumo wa alibamu sa wo takalaho na wo pfumaho nga maḓipfele, wo ḓisendekaho kha Afro-pop and soul, na nyimbo dzo hevhedzwaho nga zwiitea zwa vhukuma na maḓipfele. I na u shumisana na vhaimbi vha fanaho na King Mizo Phyll, Crazy Frazer, JR Player, Blessa na mutambi wa kaṱara Muhulwane. Ramzeey o ri u shuma na avha vhaḓivhi vha zwa vhutsila zwo engedza "u ṱangana na vhutshilo" kha mushumo.
Luimbo luthihi, nga maanḓa, lu bvelela nga ṅwambo wa u funa haḽo hu songo lavhelelwaho. "Ndi a zwi ḓivha uri vhunzhi ha vhafuni vhanga vha a mpfuna kha nyimbo dza lufuno, fhedzi hu na iṅwe ine ya amba nga ha lufuno nga nḓila ine ya mangadza na u sa i ḓivha. Ndi tenda uri zwi ḓo sia vhathu vha tshi humbula," o ralo.
Ramzeey u tenda uri Tongue Letter vhu swaya nyaluwo yawe sa mutsila. "Vhathu vho vha vha tshi nḓivha sa muthu ane a kha ḓi gonya, fhedzi zwino ndi khou ranga phanḓa, ndi tshi sika nga ndivho. Hu na nyaluwo kha nḓila ine nda ṅwala ngayo, u dzudzanya na u tamba. Ni nga pfa uri albamu iyi yo lugiselelwa nga vhuronwane na bono."
Musi a tshi khou haseledza nga ha maitele awe a u sika, o amba uri u thoma nga u rwa, nga murahu a tendela melody i tshi livhisa maipfi. O ṱalutshedza a ri: "Arali miungo i tshi pfala i tshi ṱungufhadza, ndi ṅwala maipfi a ṱungufhadzaho. I elela nga lwa nzulele." Naho hu na mutsiko wa nḓowetshumo, u dzula o livhisa ṱhogomelo kha vhungoho. "Dziṅwe dza nyimbo dzanga khulwanesa a dzo ngo vhuya dza itwa nga ndivho ya u vha dzi hits. Ndi tou vha na ndivho ya u sika tshithu tsha vhukuma."
Tongue Letter ndi u hulisa vhatikedzi vhawe na u sumbedza lwendo lwawe lwa muzika. "Ndo vha ndi tshi ṱoḓa uri heyi album i vhe mulaedza wa u livhuwa kha muṅwe na muṅwe we a ntikedza. Ndo vha ndi tshi ṱoḓa u ṱuṱuwedza na u ṱanganya muzika."
Ramzeey o khwaṱhisedza uri mitambo ya vhukuma, vidio dza muzika na nyendo dzi nḓilani. "Hu na zwinzhi zwine zwa khou ḓa, nahone zwi ḓo bvelela nga zwiṱepisi," o ralo.
Alibum, o engedza nga uri, yo vha tshiṱuṱuwedzi tsha nyaluwo ya muthu nga eṱhe na ya phurofeshinaḽa. "Ndo aluwa vhukuma kha u ṅwala luimbo, u bveledza na maipfi. Ndo dovha nda fhaṱa vhushaka ho khwaṱhaho na vhaṅwe vhaimbi vha re na vhukoni nga tshifhinga tsha lwendo ulwu."
U fulufhela uri vhathetshelesi vha khou tshimbila na milaedza ya lufuno, lutendo, muta na vhuthu. O phetha nga u ri: "Hezwi ndi zwithu zwa ndeme zwi re mbiluni ya yeneyi alibamu, nahone ndi fulufhela uri vhathu vha pfa zwenezwo nga luimbo luṅwe na luṅwe."