Tshiṱori nga Thembi Siaga. Ṱhalutshedzo nga Khathutshelo Raliphaswa.
Naho vhafumakadzi vhanzhi vhaṱuku vha bvaho kha murafho wa Princess Raphalalani vha tshi sedza kha lufuno lwa tshithu tshithihi fhedzi, Princess u ṱanganya masia mavhili o fhambanaho - vhuinzhiniyara ha muḓagasi na fesheni - u itela u maanḓafhadza vhafumakadzi vhaṱuku sa ene. Musidzanyana wa minwaha ya 23 u bva Ngwenani Ya Mapholi ndi mutshudeni wa vhuinzhiniere ha muḓagasi wa ṅwaha wa vhuvhili kha gudedzi ḽa Vhembe TVET.
Raphalalani o no vha mufunwa wa vhanzhi kha zwileludzi zwa vhudavhidzani ha matshilisano ha nnyi na nnyi, a tshi kuvhanganya vhatevheli vha fhiraho 246,000 kha Facebook, hune a kunga vhathetshelesi vhawe nga u vha hone hawe nga ene mune, muhumbulo wa fesheni u mangadzaho, na muya wa vhubindudzi. Ha khou fhelisa zwithivheli fhedzi kha nḓowetshumo ine ya langiwa nga vhanna, fhedzi u dovha a shumisa ṱhuṱhuwedzo yawe ya nyanḓadzamafhungo ya matshilisano u ṱuṱuwedza mamaga a vhupo ha mahayani na u ṱuṱuwedza vhafumakadzi vhaṱuku uri vha tevhele mishumo kha masia ane kanzhi vha vha vha songo imelelwa nga nḓila yavhuḓi.
Vhukoni hawe ha u linganisa lwendo lwawe lwa zwa pfunzo na lutamo lwawe lwa u ṱuṱuwedza dzi mamaga na zwiitea zwo ita uri a vhe muthu ane a vha na vhushaka na u ṱuṱuwedza kha vhaswa vhanzhi vha Venda. Nga mushumo wawe, Raphalalani u khou sumbedza uri vhafumakadzi vha nga bvelela kha nḓowetshumo iṅwe na iṅwe, vha tshi sumbedza uri lufuno, u shuma nga maanḓa, na u ḓifulufhela zwi nga fhelisa zwithivheli.
"Ndi ḓitika nga nṋe muṋe zwino, nahone ndi nṋe ane nda khou tikedza mme anga. Ṅwaha wo fhiraho, ndo vha vhudza uri vha litshe u badela vhudzulo hanga na zwiḽiwa. Ndi ṱuṱuwedza vhaswa uri vha vuwe vha thome u shuma," o ralo. O dovha a ṱuṱuwedza vhafumakadzi vhaṱuku uri vha tevhele mishumo ine ya langiwa nga vhanna nga mvelele, vha tshi tenda uri vha a kona u bvelela kha masia aya.
"Nga u ṱanganya ngudo dzanga dza vhukoni hanga hazwa mushumo na lutamo lwanga lwa fesheni na u ṱuṱuwedza, ndi ṱoḓa u sumbedza vhaswa uri zwi a konadzea u ṱanganya zwipikwa zwinzhi na u bvelela kha zwoṱhe," u ralo.