Tshiṱori nga: Entertainment. Ṱhalutshedzo nga: Khathutshelo Raliphaswa.
Nga murahu hau lindelwa u humela kha muzika ha Vho Ras Willie, murwa wa mavu kha vhatakaleli vha muzika wa rege, vho vhuya nga aḽibamu thangeli ya nyimbo nna, ine ya vhidzwa "Vhufa Hashu", ine ya ḓo anḓadzwa ṅwedzi u ḓaho wa Ṱhafamuhwe.
Vho Ras Willie, vhe vha bebwa nga la Wilson Dzebu, ndi ramuzika wa muzika wa sialala wa rege vhane vhoḓi imisela u vusuludza, u vhulunga na u alusa sialala na mvelele ya vhathu vha Afrika. Vho thoma u ḓivhiwa hunzhi nga aḽibamu yavho ya nyimbo dza fumi-na-mbili ya rege ya sialala ya Tshivenda ya "Vhulunga Zwau" nga Tshimedzi 2019. Aḽibamu iyo yovha na bvumo he vha pfufhiwa kha tshiphuga tsha muzika wa Tshivenda sa ramuzika wa khwine.
Naho vhunzhi ha vhoramuzika vha tshi anḓadza mizika yavho ṅwaha na ṅwaha, Vho Ras Willie vha tenda khau anḓadza muzika une wavha na mulaedza une wa ḓo dzula kha vhathu lwa tshifhinga tshilapfu. "Muzika une nda u anḓadza ndi une wa takalelwa ng vhathu vha minwaha yoṱhe, vhahulwane na vhaṱuku. Nga murahu ha minwaha miṱanu ndo ṱutshela muzika, vhathu vha tshe vha kha ḓi takalela aḽibamu yanga yau thoma. Muzika wanga au xetshelwi nga mulaedza une muthu a nga u shumisa sa izwi wo ḓala ḓivhazwakala ya Afrika na na vhubvo ha siala ya Afrika. U vhuya hanga kha muzika ndi nḓila yau ṱoḓa u dzhia hafhu vhuimo hanga kha nḓowetshumo ya muzika wa rege," vha amba.
Vho Ras Willie vho thoma buḓo ḽavho ḽa muzika vhe na miṅwaha ya malo fhedzi nga ṅwaha wa 1979, vha tshi shuma u amba, u tshina nau lidza kha bennde ya Thinawanga ire kusini kwa Makonde, he vha aluwa hone na zwino vha dzula hone. Nga fhasi hau gudiswa nga munnaavhane vhe vhavha vha tshi lidza kaṱara Vho Azwivhavhi Ndou, vho no shuma na vhoramuzika vha fanaho na Phillip Tshililo, Kenny Murabi, Burning Saul Nephawe na Shufflers Ragimana.
Aḽibamu iyi thangeli ina nyimbo nna dzine dzavha Vhonanani nnḓu yashu ( ye vha vha na ṱhanganyelano na Vho Ananius Begwa), Nyamutwa wo lala, Tshitutulu tshitutu, na Luambo lwa musanda. Aḽibamu thangeli iyi yo kandiswa, ya dzudzanywa, nau kunakiswa nau bveledzwa nga Vho Ananius Begwa.