Tshiṱori nga: Kaizer Nengovhela. Ṱhalutshedzo nga: Khathutsheo Raliphaswa.
Mugudiswa wa tshikolo tsha vhana vhavhuholefhali tsha Tshilwavhusiku Razwimisani, Tshedza Rathumbu wa minwaha ya fumbilithihi, udo imelela Afrika Tshipembe kha mutambo wa thenisi ya ṱafulani kha mitambo ya Special Olympics Summer World ya ṅwaha uno ngei ḓoroboni ya Berlin, Germany, ubva nga ḽa fumisumbe u swika nga ḽa fumbili-ṱhanu Fulwi.
Mitambo iyi ndi yone mihulwane ine ya katela mitambo yoṱhe, ine ha dzhenelela vhatambi vha vhaholefhali kha mitambo i swikaho fumbilirathi.
U sumbedza umu tikedza sa tshikolo, vha tshikolo tsha Tshilwavhusiku Razwimisani vho mu itela mushumo wa pheletshedzo nga Ḽavhuraru ḽa fumisumbe Shundunthule. Mushumo uyo wo loshwa nga vhaimeleli vha bvaho kha muhasho wa mitambo, vhutsila na mvelele, Meyara mufareli wa Masipala wa Makhado, mu khantsela Vho-Racheal Gabara, na muimeleli wa mitambo yo khetheaho ya Afrika Tshipembe.
Vho-Collins Thovhakale, mulangi wa mitambo, vhutsila na mvelele, vhari sa tshiṱiriki, vunḓu na shango vha a ḓirwa khana nga mishumo ya Rathumbu. Vho fulufhedzisa u ṋea Rathumbu na vhanwe vhatambi vho nangwaho ubva vunḓuni ḽa Limpopo ṱhoḓea dzoṱhe dzo fanelaho uri vhavhe na lwendo lwavhuḓi ngei Berlin.
Mugudisi wa Rathumbu, Vho-Winny Petlo, vhari Rathumbu ndi mugudiswa oḓi imiselaho hone vhaa fulufhela uri uḓo fhufhisa fulaga ya Afrika Tshipembe nṱha. "Ri pfa ro hulisea hone ri fulufhela uri uḓo vhuya na nḓivho ine aḓo kovha na vhatambi ngae na vhanwe vhanzhi. Vhagudisi vhavho asi vhagudisi fhedzi, vha dovha hafhu vhavha vhaunḓi khavho lune vha khou shuma zwavhuḓi navho," vha amba.
Rathumbu u eletshedza vhanwe vhagudiswa uri vha vhone miṱaṱisano sa tshiga tshau vula mavothi a zwikhala zwinzhi uri vha kone u vhonwa vhukoni havho. "Sa muṱhannga a bvaho kusini, ndi wa mashudu u nangwa u imelela Afrika Tshipembe mashango davha. Mashaka, vhagudisi na vhagudiswa vho nṋea thikhedzo ine ya nthusa nau nṱuṱuwedza uri ndi shume ndo ḓi imisela. Hezwi ndi zwihulwane kha vhutshilo hanga, hone ndi zwi vhona sa tshikhala tsha luthihi vhutshiloni. Ndi tenda uri ndi ḓo vhuya na nḓivho na tshenzhemo ine nda ḓo kovha na vhanwe," a amba.