Ndi tamela vhavhali vha gurannḓa yashu maḓuvha a holodei dza khushumisi na ṅwaha muswa uri avhe avhuḓi.
Uno ṅwaha wo tshimbila zwavhuḓi he ra vhona vhathu vhanzhi vha tshi bveledza zwinzhi zwe zwa ita na u ṱuṱuwedza vhaṅwe vhathu.
Hovha hu sa ḓovha ṅwaha wavhuḓi arali husina mafhungo a tshuwisaho kha bammbiri ḽashu. Naa vha azwi humbula musi mufumakadzi we avha a khou lingedza u tzhipiwa Haluvhimbi a tshi luma lulimi lwa munna onoyo? Zwenezwo zwo vha zwi tshi tshuwisa na u vha na tshivhindi khae.
U vha vhuponi ha mahayani tshiṅwe tshifhinga zwi vhonala zwi fhethu ho tsireledzeaho vhukuma fhedzi zwo vha zwi songo ralo ṅwaha uno musi malwadze na mpfu dzi bvaho kha zwiḽiwa zwi tshi phaḓalala shangoni ḽashu. Ri ḓo dzulela u humbula vhana vhe vha tshenzhema izwo uno ṅwaha nga nṱhani ha hezwi hu tshi katelwa na Munei Mulaudzi wa minwaha ya 13 ubva Khubvi, tshiṱori tshine tsha pfisa vhuṱungu vhukuma tshe nda tshi ṱalutshedzela uno ṅwaha.
Fhedzi ri songo tou dzulesa kha ane a ṱungufhadza fhedzi, vha azwi humbula musi Vendaboy Poet a tshi renda phanḓa ha Muphuresidennde vha ḽino? Ndi tshiṱori tshe nda ḓiphina nga u tshi ṱalutshedzela ndo ḓala u ḓikukumusa nga muṅwe washu fhano Vhembe.
Zwe zwa tou takadzesa kha uno ṅwaha hovha musi ndi tshi pfufhiwa zwiphuga kha ino nḓowetshumo ya zwa nyanḓadza mafhungo zwine zwa amba nyaluwo.
Kha vha ḓiphine nga vhuḓifhinduleli ri dovhe ri ṱangane nga 2025 ri na mutakalo wavhuḓi.