Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Vha muṱa wa ha Tshivhulawa u bva kusini Ha-Madodonga, kha vhupo ha Ha-Kutama, vhari vha dzula nga nyofho, ndi nga murahu ha u huvhadzwa ha munwe wa miraḓo ya muṱa uyo nga munna we avha a khou seisana na ṅwana wa afho muḓini nga tshihali tshifhira vhukuma. Munna uyu o ṱhavha Vho-PinkiebTshivhulawa lwa tshivhalo a tshi dovha avha shushedza uvha vhulaha.
Vho- Tshivhulawa, vhari zwoṱhe zwo thoma musi muhumbulelwa atshi dzhena muḓini wavho nga ḽa fumiṱhanu Fulwi a thoma u lwisana na ṅwananyana wavho. Vho-Tshivhulawa vhori vha tshi lingedza u lamula, muhumbulelwa o ḓou thoma uvha ṱhavha lwa tshivhalo nga phanga.
Tshiwo itshi tsho vhigiwa mapholisani hone Vho-Tshivhulawa vha iswa vhuongelo ha Tshitandani, he vha fhiriselwa kha vhuongelo ha vunḓu ha Bulugwane. Vha vhololwa vhuongeloni nga murahu ha maḓuvha maṋa.
Muṱa wa ha Tshihulawa vho vhewa tshiṱitshini tsha Tshilwavhusiku uri vhavhe vho tsireledzea, ngeno mapholisa vha khou zwimana na muhumbulelwa. Naho Vho-Tshivhulawa vho ṱalusa muhumbulelwa nga nḓila i vhonalaho, ahuna muthu ono farwaho, hone vha muṱa vhari vha tshila nga nyofho.
Vho-Tshivhulawa vhari mapholisa a vha khou lila navho hone a vha khou shuma lwo linganaho u fara muhumbulelwa. "Mapholisa vho kundelwa uthusa muṱa. Ndo lingedza zwoṱhe uri muiti wa zwiito izwi a farwe, nda dovha hafhu nda vha laedza na hune a dzula hone, fhedzi ahuna zwo no iteaho. Muhumbulelwa a nga dovha hafhu ari dzhenela ari vhulaha," vha amba. Vho-Tshivhulawa vhari mapholisa vha khou ongolowo kha u zwimana na muhumbulelwa. "Ndi ofha uri muhumbulelwa anga vhuya a lingedza u vhulaha ṅwana wanga. A vhulawa, vhana vhawe vha ḓo ṱhogomelwa nga nnyi," vha engedza.
Vhamusanda Vho-Ntanganedzeni Kutama, vhari vho wana mbilaelo nga mulandu uyu nga ḽa fumi rathi Fulwi. "Ri pfa ri songo fushea nga tshumela ya kha mulandu uyu. Ro dzhia maga a uḓi ṱoḓela muhumbulkelwa uyu, huu itela uri vha muṱa wa ha Tshivhulawa vhavhe na mulalo," vha zwa.
Muambeli wa mapholisa a vunḓu ḽa Limpopo Vho-Malesela Ledwaba vhari ṱhoḓisiso kha mulandu uyu dzi khou bvela phanḓa. Vho khwaṱhisedza uri muhumbulelwa haathu u farwa, vha dovha hafhu vha humbela uri vhadzulapo vha tshumisane na mapholisa u wana muhumbulelwa uyu.