Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Nyalunako Rudzani Queen Bright, a bvaho Vleifontein, o ḓi imisela u fhufhisa fuḽaga ya Afrika Tshipembe nga u ḓi ṱongisa musi a tshi imelela Afrika Tshipembe kha muṱaṱisano wa vhonyalunako wa Miss Cultural Queen Afrika une wa ḓo farelwa shangoni ḽa Nigeria mafheloni a ṅwaha-uno. Rudzani u ḓo imedzana na vhonyalunako vha swikaho fuṱhanu-raru vha bvaho kha mashango a dzhango ḽa Afrika hu tshi katelwa Zimbabwe, Nigeria, Zambia na Ghana.
Rudzani o pfufhiwa sa khosikadzi ya Miss Cultural Queen Afrika Afrika Tshipembe nga ṅwedzi wa Nyendavhusiku ṅwaha wo fhelaho. Zwa zwino ndi mutshudeni wa ṅwaha wa vhuraru kha buḓo ḽa Bcom Accounting kha gudedzi ḽa Yunivesithi ya Venda, o ṱahisa na nḓila ine o ḓi lugisela ngayo uri vhadzulapo vha Afrika Tshipembe vha ḓi rwe khana ngae. "U nangwa u imelela shango ḽashu zwi touvha khuliso kha nṋe sa izwi ndi tshi ḓi ṱongisa nga shango ḽashu, zwi dovha hafhu zwa sumbedza uri vhathu vha kona u vhona vhukoni hanga ha u kona u imelela shango zwavhuḓi," a amba.
U ṱalale muṱaṱisano wa vhonyalunako wa Miss Afrika Tshipembe ndi zwe zwa takusa dzangalelo ḽawe kha buḓo ḽa uvha nyalunako nga ṅwaha wa gidimbili fumi-ṱhanu. Naho ovha a tshi nyama u dzhiela buḓo ḽawe nṱha, nga ṅwaha wa gidimbili fumbili-thihi o thoma u dzhenelela kha miṱaṱisano ya vhonyalunako. Zwa zwino e na minwaha ya fumbili-thihi, u na mabannda a fhiraho a rathi kha buḓo iḽi, hu tshi katelwa mukololo wa vhuvhili wa Miss Yunivesithi ya Venda 2021 na mufhenyi kha Miss Makhado Royal 2022. "Kha zwoṱhe zwine nda ita, ndi ita ndi na muhumbulo wa u bveledza zwavhuḓi khamitatisano yothe, zwine zwa ite uri mishumo yanga i leluwe," a amba.
Rudzani ndi muambeli na muimeleli wa u lwa na u tambudzana ha mbeu na u tambudzana vhukati ha vhana. O aluwa vhukati ha vhathu vhe vha vha vha tshi tambudzwa nga nḓila dzo fhambanaho fhedzi vha tshi balelwa u amba nga hazwo vha tshi ofha u haṱulwa. "Ndi zwone zwine zwa nngita uri ndi shumise tshikhala tsha uvha nyalunako uri ndivhe ipfi ḽa vhane vha balelwa u ḓi ambela. Ndi ṱoḓa uri mishumo yanga i thuse u fhaṱa lushaka na u ṱuṱuwedza vhanzhi," a amba a tshi vhina.