Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Rudzani Queen Bright, a bvaho Vleifontein, o shuma zwavhuḓi kha vhuṱambo ha u pfufhiwa dzi nguwane dza muṱaṱisano wa vho nyalunako ha Miss Cultural Queen Afrika 2023. O pfufhiwa kha zwitenwa zwa Miss Intellectual, Boss Walk, na zwiambaro zwa u bambela zwa khwine. Vhuṱambo uho ho farelwa Camp David Event Centre ngei Port Harcout, Nigeria, nga ḽa u thoma ḽa Tshimedzi ṅwaha uno.
Muṱaṱisano uyo wovha yo dzhenelelwa nga vho nyalunako vha bvaho kha mashango a fuṱhanu-raru, hu tshi katelwa Zimbabwe, Zambia, Nigeria, Ghana, na ḽashu Afrika Tshipembe. Rudzani o kona u swikelela maimo a nṱha. Uri u pfufhiwa kha zwiteṅwa izwo zwi amba zwihulu khae, zwi dovha hafhu zwa sumbedza uri mishumo yawe i khou vhonala.
"Muṱaṱisano uyu u ṱanganya vhathu vha Afrika u bva kha mashango a u fhambana, u tshi vha thusa u guda nga ha tshaka dza lunwe lushaka na u pfesesa ndila dzavho dza u ita zwithu. Ndo takala vhukuma na u ḓi rwa khana uri sa izwi ndovha ndo ḓi imisela u imelela vhathu vha Afrika Tshipembe. Yo touvha khuliso kha nne u fulufhelwa nga mushumo uyu wa vhuṱhogwa, nda dovha nda ḓiselwa dakalo uri ndo kona u ḓi imelela na vhathu vhahashu (Afrika Tshipembe) zwavhuḓi," a amba.
Rudzani ndi mugudiswa wa ṅwaha wa vhuraru wa BCom gudedzini ḽa UNIVEN, uri ndi zwinzhi zwe a ita sa nḓila dza u i lugisela ḓuvha ḽa vhuṱambo uho. "Ndugiselo dzanga dzo thoma nga ṅwedzi wa Lambamai, hone ndovha ndo ḓi imisela u swikelela maimo e vho nyalunako vha kale vha swika khao. Ndoro dzanga ndi u swikelela u ḓi wana ndi kha nḓowetshumo ya zwa nyalunako na zwa u anḓadza zwiambaro zwi tshi tou kandwa," a amba.
O ḓi imisela u shumisa vhuimo hawe u funza vhathu vha Afrika nga ha vhundeme ha u farana, ri sa sedzi fhethu hune vha bva hone, muvhala na luambo.